Dünya Bankı (DB) Azərbaycanda sığorta sahəsində qanunvericiliyi təkmilləşdirmək və beynəlxalq təcrübəyə uyğunlaşdırmaq məqsədilə Maliyyə Nazirliyinə məsləhət xidmətləri göstərmək üçün Kanadanın Lawrie Savage & Associates Inc şirkətini seçib. MN-nin dövlət sığorta nəzarəti üzrə şöbəsinin rəisi Bəybala Xankişiyevin Trend ə verdiyi məlumata görə, onlar öz səlahiyyətlərinin icrasına iyunun 15-dən başlayacaqlar.
Onun sözlərinə görə, məsləhətləşmələr DB-nın $325 min məbləğində göstərdiyi texniki məsləhətləşmələr çərçivəsində göstəriləcək. Nazirliklə məsləhətçilər arasında müqavilə mayın 15-də imzalanıb. Maliyyə naziri Samir Şərifov texniki yardım barədə qrant razılaşması imzalayıb və sənəd Dünya Bankına göndərilib. O, geri alınandan sonra təsdiq olunmaq üçün Nazirlər Kabinetinə təqdim olunacaq.
Məsləhətçinin vəzifələrinə "Sığorta haqqında" yeni Qanuna əlavənin hazırlanması, onun qəbulu ilə bağlı normativ-hüquqi aktların tətbiqi, eləcə də "Məcburi sığorta haqqında" yeni qanun layihəsinin işlənməsində iştirakdan ibarətdir.
MN-nə sığorta sahəsində islahatların aparılması və sığorta qanunvericiliyinin təkmilləşdirilməsi sahəsində texniki yardım "Maliyyə sektorunun gücləndirilməsi" First İnitiative proqramı çərçivəsində həyata keçirilir. Bu proqram çərçivəsində ölkə hökumətilə danışıqlar hələ 2005-ci ilin əvvəllərindən başlanılıb. Danışıqlar zamanı S.Şərifov və proqramın inzibati direktoru Robert Vudbriç texniki yardım göstərilməsi ilə bağlı müqavilə imzalayıblar. Konsultasiya xidmətləri MN-nə Britaniyanın Emerging Market Economics Limited şirkəti tərəfindən göstəriləcək.
FİRST proqramının donorları Böyük Britaniyanın Beynəlxalq İnkişaf Departamenti, Kanadanın Beynəlxalq İnkişaf üzrə Agentliyi, İsveçrənin İqtisadi məsələlər üzrə Dövlət Katibliyi, Hollandiyanın XİN və İsveçin Beynəlxalq İnkişaf Koorporasiyasıdır.
