2006-cı ilin yanvar-aprel aylarında Azərbaycanın gömrük orqanları tərəfindən 54 148 yük gömrük bəyannaməsi rəsmiləşdirilib. Bunun 11 394-ü ixracatın, 42 754-ü isə idxalın payına düşür.
Trend agentliyinin Dövlət Gömrük Komitəsinə (DGK) istinadən yaydığı məlumata əsasən, bəyannamələrin ümumi sayı 2005-ci ilin analoji dövri ilə müqayisədə 6,68% və ya 3 392 ədəd artıb, eləcə də ixrac üzrə artım 18,33%, idxal - 3,96% təşkil edib.
2006-cı ilin yanvar-aprel aylarında nəqliyyat vasitəsilə 67 45,5 min ton yük daşınıb ki, bu da əvvəlki ilə nisbətən 24,25% çoxdur. Bunun 3103,4 min tonu ixracın, 3642,1 min tonu - idxalın payına düşüb. İxrac əməliyyatları sahəsində dəniz nəqliyyatının payına 2559,9 min ton yük, dəmir yolu - 349,4 min ton, avtomobil - 156,9 min ton düşüb.
Tranzitlə Azərbaycan ərazisi vasitəsilə 2030,1 min ton yük daşınıb. Yüklər İsveçrə (620,6 min ton), İtaliya (448,9 min ton), Gürcüstan (371,1 min ton), Kipr (103.1 min ton), Tacikistan (78,7 min ton), Rusiya (75,6 min ton), İran (64,5 min ton), Türkiyə (58,1 min ton) və Türkmənistandan (56,3 min ton) daşınıb.
