Parlamentin İqtisadi Siyasət Komissiyası lizinq fəaliyyətinə vergiqoyma sahəsində Azərbaycan Lizinq şirkətlər Assosiasiyasının təkliflərini dəstəkləyir. Komissiyanın rəhbəri Ziyad Səmədzadənin Trend ə verdiyi məlumata görə, işçi qrupunda Vergilər, Maliyyə Nazirlikləri və Assosiasiya nümayəndələrinin iştirakı ilə yaxşı müzakirələr aparılıb.
"Əgər biz sahibkarlığı inkişaf etdirmək, sərmayə axınını təmin etmək, iqtisadiyyatımızın maddi-texniki bazasını möhkəmləndirmək istəyiriksə, biz daha bir amildən - lizinq fəaliyyətindən istifadə etməliyik. Biz keçmiş SSSR-nin bir çox ölkələrində lizinq fəaliyyətinin vəziyyətini təhlil etmişik və doğrudan da bizdə bu fəaliyyəti göstəricilərini yaxşılaşdırmaq üçün imkanlar mövcuddur", - deyə o qeyd edib.
Bu gün ölkədə ÜDM-də lizinqin payı ən çoxu 0,2% təşkil edir ki, bu da çox aşağı göstəricidir. Onun sözlərinə görə, Azərbaycanda qanunvericiliyin təkmilləşdirilməsi, ƏDV-dən azad oluna biləcək avadanlıqların konkret növlərinin müəyyən edilməsi vasitəsilə real imkanlar mövcuddur. "Düşünürəm ki, biz bu məsələlərlə bağlı konsensus əldə edəcəyik. Yeni iş yerlərinin açılmasına şərait yaradan avadanlıqların konkret növləri xammal ehtiyatlarının səmərəli istifadəsinə imkan verir, sənaye istehsalının intellektual səviyyəsini artırır", - deyə Z.Səmədzadə hesab edir.
O bildirib ki, bu təkliflər bu ayın sonunadək parlamentdə müzakirə olunacaq. Bu təkliflər 2007-ci ildə Vergi Məcəlləsinə dəyişiklik və əlavələrin edilməsi layihəsinə, bəziləri isə Nazirlər Kabinetinin ƏDV-dən azad edilmiş avadanlıqlar siyahısı haqqında qərarına daxil edilə bilər.