"Təhsil haqqında" qanun Milli Məclisin payız sessiyasında mütləq qəbul edilməlidir. Bu barədə Trend ə Vətəndaş Həmrəyliyi Partiyasının (VHP) sədri Sabir Rüstəmxanlı bildirib.
Millət vəkili qeyd edib ki, bu qanuna əlavə və dəyişikliklər edilməklə parlamentin yaz sessiyasında qəbul ediləcəyini gözləyirdik. Lakin müəyyən səbəblər üzündən qanunun qəbulu təxirə salınıb: "Mən düşünürəm ki, təhsil sahəsindəki vəziyyəti stabilləşdirmək üçün bu sənədin qəbulunu yubatmaq olmaz".
Vətəndaş Birliyi Partiyasının sədri, millət vəkili Sabir Hacıyev də həmkarının fikirlərini dəstəkləyib. Qeyd edib ki, "Təhsil haqqında" qanunun qəbul edilməsi təhsil sahəsində yaranmış problemlərə aydınlıq gətirəcək: "Qarşımızda Ən vacib vəzifələrdən biri də bu sənədin qəbuludur. 1992-ci ildə qəbul edilən bu sənəd indiki reallıqlarla uyğunluşadığından yenidən işlənməlidir".
Böyük Quruluş Partiyasının sədri, millət vəkili Fazil Qəzənfəroğlu, Anna Vətən Partiyasının sədri, millət vəkili Fəzail Ağamalı və digər millət vəkilləri də "Təhsil haqqında" qanunun Milli Məclisin payız sessiyasında qəbul edilməsinin zəruriliyini bildiriblər.
