Milli bank tərəfindən açıqlanmış ödəniş balansına əsasən, 2006-cı ilin birinci rübündə 30,5 milyon dollar məbləğində müsbət saldo yaranıb. Ödəniş balansının vəziyyətinin yaxşılaşmasına yerli məhsula xarici tələbatın artması, ölkənin sərmayə iqliminin yaxşılaşması ilə əlaqədar sərmayə axını və neftin dünya qiymətinin artım amilləri təsir edib. Ödəniş balansının cari hesabının saldosu da müsbət olub və 494,8 milyon dollar təşkil edib.
Trend in verdiyi xəbərə görə, ötən illə müqayisədə xarici ticarət balansında müsbət saldo 1,5 milyard dollara çatıb (42,7%). Xarici ticarət dövriyyəsinin ümumi həcmi 2005-ci ilin yanvar-mart aylarının göstəricilərini 52,7% keçərək, 2006-cı ilin birinci rübündə 3,4 milyard dollar olub. Bu zaman 958 milyon dollar məbləğində əmtəə idxalı (27,2%), 2464 milyon dollar (69,9%) məbləğində isə ixrac əməliyyatları həyata keçirilib.
Birinci rübdə 113 ölkə ilə ticarət münasibətləri qurulub. Bu zaman ticarət dövriyyəsinin 15,4%-i MDB ölkələrinin payına, 84,6%-i isə digər xarici ölkələrin payına düşür. İntensiv ticarət münasibətləri İtaliya, Rusiya, Türkiyə, İzrail, İran, Böyük Britaniya, Rumıniya, Almaniya, Gürcüstan və Türkmənistan ilə olub. Azərbaycanın idxal-ixrac əməliyyatlarının 83,4%-i onların payına düşür.