Azərbaycan İpoteka Fondu (AİF) ölkə regionlarında ipoteka kreditlərinin verilməsinə başlayıb. İlk kredit Quba rayonunda verilib, ikinci kreditin Gəncədə veriləcəyi ehtimal olunur. Trend in verdiyi xəbərə görə, bu barədə AİF-in İcraçı direktoru Faiq Məmmədov bildirib. Bu krediti nəzərə almadan AİF 450 min AZN məbləğində 24 kredit verib.
Onun sözlərinə görə, bu gün AİF-in 15 tərəf müqabili olan banklardan 10-u ipoteka krediti verir. Ötən 3 ay ərzində orta hesabla 1 kreditin dəyəri 21 min AZN olub, kredit illik 11% orta, 8% minimal tariflə 13 il müddətinə verilib. Mənzilin orta sahəsi 57 kv. metrdir.
Bu zaman tendensiya göstərir ki, verilən kreditlərə görə maksimal aylıq ödəniş kreditlər üzrə 280 AZN, minimal ödəniş isə - 95 AZN təşkil edib. İpoteka kreditinin inkişafı üçün hazırda ilkin bazarın inkişafını nəzərdə tutan konsepsiya üzrə işlər aparılır. "Dünya təcrübəsi göstərir ki, bu sahənin inkişafı üçün agent-institutların yaradılması, ikinci bazarın (sekyuritizasiya) və İnternet-ipotekanın formalaşdırılması labüddür", - deyə o qeyd edib.
"Bu sahənin inkişafı üçün kreditlərin verilmə prosedurlarının asanlaşdırılması (ilkin ödəniş, vergilərdən azad olma), qeydiyyat müddətinin azaldılması, bölgələrdə AİF fililallarının yaradılması, büdcə vəsaitlərindən asılılığı azaltmaq üçün fondun nota və istiqraz vərəqələrinin buraxılması, həmçinin xarici maliyyənin cəlb olunması effektiv olardı", - deyə direktor bildirib.
