Maliyyə Nazirliyinin xahişi ilə Beynəlxalq Valyuta Fondu nazirliyin Xarici-iqtisadi fəaliyyət idarəsində xarici borcun idarəsi üzrə şöbənin funksional öhdəlikləri üzrə tövsiyələr hazırlayıb. Maliyyə nazirliyindən Trend ə verilən xəbərə görə, səfəri iyunun 16-da başa çatmış BVF-in ekspert-məsləhətçisi Darioş Farsimadanın təqdim etdiyi hesabat Azərbaycan ekspertlərinin təkliflərini nəzərə almaqla tamamlanacaq. Valyuta fondunun texniki missiyası ilə hesabatın növbəti müzakirəsi iyulun əvvəlində gözlənilən səfər zamanı olacaq.
Tövsiyələr digər ölkələrdə dövlət borcunun idarə olunması üzrə ən yaxşı təcrübələrə əsasən hazırlanıb. Məsləhətçi xarici borcun idarə olunmasına aid olmayan məsələləri şöbənin öhdəlikləri sırasından çıxarmağı təklif edir, çünki bu gün onun işçiləri xarici-iqtisadi fəaliyyət məsələləri ilə də məşğul olurlar və bu onların iş qrafikinin yüklənməsinə səbəb olur. Bunun əvəzinə, onlar cəlb olunan xarici kreditlər üzrə risklərin təhlilinə diqqət yetirməli, gələcək strategiyanı öyrənməlidirlər. Ümumilikdə, Azərbaycanın çox az xarici borcu olduğundan və ciddi təhlükə yaradan problemli kreditləri olmadığından ona müsbət qiymət verilib. Digər tərəfdən BVF məsləhətçisi Azərbaycanın donor olacağı gələcəyə aid məsələləri Maliyyə Nazirliyinin fəaliyyət dairəsinə daxil etməyi məsləhət görüb.
Fondun missiyası Mərkəzi Asiya və Azərbaycanda dövlət borcunun idarəsi üzrə BVF-in regional texniki yardım layihəsinin dəstəyi ilə həyata keçirilib. Bu layihə çərçivəsində artıq 4 ildir ki, AR Maliyyə Nazirliyinə yardım göstərilir. Texniki yardım dövlət borcu, proqram təminatının, avadanlığın alınması və s. məsələlər üzrə göstərilib.
BVF-in regional layihəsi bu yaxınlarda dövlət borcunun idarəsi və dövlət qiymətli kağızlar bazarının inkişafının təkmilləşdirilməsi çərçivəsində imkanların genişləndirilməsi haqqında qərar qəbul etmiş İsveçrənin iqtisadi məsələr üzrə Dövlət katibliyinin (Seco) texniki yardımı ilə həyata keçirilir. Texniki yardımın həcmi 2 milyon ABŞ dolları, layihənin həyata keçirilmə müddəti isə 3 ildir. Layihə BVF-in Texniki idarəetmə ofisi tərəfindən həyata keçiriləcək və Azərbaycan, Qırğızıstan və Tacikistan üçün nəzərdə tutulub. Texniki yardımın ümumi həcmindən Azərbaycana 30% ayrılacaq.