İyulun 11-də İqtisad Məhkəməsində İqtisadi İnkişaf Nazirliyinin "Barmek-Azərbaycan" Elektrik Şəbəkəsinə qarşı qaldırdığı iddia əsasında çıxarılmış qərardan verilən şikayətə baxılıb. Trend in məlumatına görə, hakim Natəvan Tağıyevanın sədrliyi ilə keçən məhkəmə iclasında "Barmek"in şikayətinin təmin olunmamasına dair qərar çıxarılıb.
Qeyd edək ki, İqtisadi İnkişaf Nazirliyinin iddiası əsasında məhkəmə "Barmek Azərbaycan" Elektrik Şəbəkəsinin əmlakına və pul vəsaitlərinə həbs qoymuşdu. Cavabdeh tərəf isə həmin qərardan məhkəməyə şikayətə vermişdi. Hakim N.Tağıyevanın sədrliyi ilə həmin şikayətə baxılıb. Prosesdə İqtisadi İnkişaf Nazirliyinin nümayəndəsi Rəşad Mustafayev, "Barmek"dən isə Səməd Tağıyev və Abbas Atakişiyev iştirak ediblər. Hakim nazirliyin iddiasının təmin edilməsi tədbiri haqqında qəbul edilmiş qərardaddan cavabdeh tərəfin verdiyi şikayəti təmin etməyib və işin İqtisad Məhkəməsinə göndərilməsinə dair qərar verib.