Türkmənistan və İran Xəzər dənizinin bioloji su ehtiyatlarının və nərə balığının qorunması və səmərəli istifadəsində, onun auditində iştirak etməkdə maraqlıdır. Trend in verdiyi xəbərə görə, bu barədə iyulun 11-də Azərbaycanın Hesablama Palatasının sədri Namiq Nəsrullayev bildirib.
Onun sözlərinə görə, Azərbaycanın Hesablama Palatası artıq audit proqramını təsdiq edib.
"Auditor tədbirlərinin həyata keçirilməsi üzrə Qazaxıstan, Rusiya və Azərbaycan arasında heç bir maneə yoxdur. İşlər il ərzində görüləcək. Əgər Türkmənistan və İranın bura qoşulmasını nəzərə alsaq, proqramın nə dərəcədə dəyişiləcəyi hələ məlum deyil. Hələ heç bir qərar yoxdur. Lakin yeni tərəfdaşların qoşulması ilə müddətin təshih edilmə ehtimalı böyükdür", - deyə N.Nəsrullayev qeyd edib.
Qazaxıstanın respublika büdcəsinin istifadəsinə nəzarət üzrə Hesablama Komitəsinin başçısı Omarxan Oksikbayev qeyd edib ki, İranın və Türkmənistanın bu tədbirlərə qoşulma istəyi sahilboyu ölkələrin bu işdə nə qədər çox maraqlı olduğundan xəbər verir. "Dəniz ümumidir və mən zənn edirəm ki, onun problemləri də ümumi olmalıdır", - deyə o qeyd edib.
Rusiyanın Hesablama Palatası (HP) və Qazaxıstanın respublika büdcəsinin istifadəsinə nəzarət üzrə Hesablama Komitəsi Xəzər dənizinin bioloji su ehtiyatlarından və nərə balığının qorunması və səmərəli istifadəsinə yönəlmiş vəsaitlərdən effektiv istifadənin yoxlanmasına dair öz təkliflərini artıq bir neçə ay bundan əvvəl təqdim ediblər. Sənədlərdə bu istiqamətdə normativ-hüquq bazasının olması, nərə balığının təkrar istehsalına yönəlmiş tədbirlərin effektivliyi və s. məsələlər öz əksini tapıb.