Hazırda Azərbaycan dəmir yolu lokomotiv parkının maliyyələşdirilməsi mümkünlüyünü nəzərdən keçirir. Bu barədə, Trend agentliyinin məlumatına əsasən, nəqliyyat nazirinin birinci müavini Musa Pənahov bildirib. Onun sözlərinə görə, hazırda Azərbaycan öz vəsaiti və kredit cəlb etməklə maliyyələşdirmə mümkünlüyünü nəzərdən keçirir.
Bu vəsait dövlət büdcəsindən ayrıla bilər. Ehtimal olunur ki, Azərbaycan layihə üçün lazım olan məbləğin yarısını təqdim edə bilər.
Nazirlikdə hesab edirlər ki, Azərbaycan üçün kreditin alınması daha səmərəlidir, çünki kreditdən başqa Avropa Bankı dəmir yolu infrastrukturunun təkmilləşdirilməsi və bərpası çərçivəsində digər layihələrin hazırlanmasına qran ayırmağı təklif edir.
AYİB-in Direktorlar Şurasında Azərbaycan Dəmir Yolu idarəsinin lokomotiv təsərrüfatının yaxşılaşdırılması üçün $50 mln. həcmində kreditin təsdiqlənməsi iyulun 25-dən 17-nə keçirilib. Bundan əvvəl isə bu proses iyunun 27-nə keçirilmişdir.
Ehtimallara görə, Avropa Bankı lokomotiv parkının müasirləşdirilməsi, bərpası və yeniləşdirilməsi üçün 4 illik güzəştlə 15 il müddətinə $30 mln. kredit ayıracaq. Kredit üzrə faiz dərəcəsi Libor +1% təşkil edəcək. ADDY 2-ci mərhələ çərçivəsində daha $20 mln. aldə etmək niyyətindədir. Bu vəsait Bakıda lokomotivlərin təmiri üçün iki deponun inşasına sərf olunacaq. Avropa Bankı ADDY-na artıq 1999-cu ildə bu şərtlərlə $20,2 mln. kredit verib. Hazırda bu kredit qaytarılır.
Lokomotiv parkının təzələnməsi TRACECA nəqliyyat dəhlizi ilə daşınmanın həcminin artması və yaxın vaxtlarda Qars-Axalkalaki-Tbilisi-Bakı layihəsinin gerçəkləşdiriləcəyi ilə bağlıdır.
