İqtisadi İnkişaf Nazirliyi yaxın vaxtlarda Türkiyənin Barmek Holdingı tərəfindən "Bakıelektrikşəbəkə" SC-yə qoyulmuş investisiyaların həcmini hesablamaq üçün beynəlxalq auditor şirkətini dəvət etməyə hazırlaşır. Bu barədə Trend ə iqtisadi inkişaf nazirinin müavini, Barmek Holding-ın müqavilə öhdəliklərinin icrasının təftişi üzrə komissiyasının rəhbəri Mikayil Cabbarov bildirib.
"Qiymətləndirici Barmek şirkətinin razılığı ilə seçiləcək. Buna görə şirkətə məsələ ilə bağlı təkliflər təqdim olunub. Biz bu prosesi tezləşdirmək istəyirik və şirkətdən tezliklə cavab verməsini xahiş etmişik" - deyə M.Cabbarov qeyd edib.
İnvestisiya qoyuluşlarının hesablanması vacibliyi haqqında qərar Barmek Holding-ın "Bakıelektrikşəbəkə"nin idarə olunması üzrə İqtisadi İnkişaf Nazirliyilə bağlanmış müqaviləyə əsasən öhdəliklərinin icrasının təftişi üzrə idarələrarası komissiya tərəfindən qəbul olunub.
Komissiya praktiki olaraq təftişi başa çatdırıb və hazırda akt tərtib edir. "Sumqayitelektrikşəbəkə" üzrə öhdəliklərin icrasının yoxlanılması isə daha 3-4 həftə çəkəcək, çünki bu elektrik şəbəkəsinin təftişinə nisbətən gec başlanıb.
Barmek şirkətinin Vaşinqtondakı İnvestisiyalar üzrə Beynəlxalq Məhkəməyə İqtisadi İnkişaf Nazirliyinə qarşı təqdim etdiyi iddiasına əsasən, o, Bakı elektrik şəbəkəsinə $291 mln. vəsait yatırıb.
Nazir müavininin sözlərinə görə, Barmek yalan deyir, çünki onun iddiası hələ də qeydə alınmayıb və investisiya öhdəlikləri beynəlxalq qiymətləndiricilər tərəfindən müəyyənləşdirilməlidir.
İlkin araşdırmalar zamanı aşkarlanıb ki, şirkət iddia etdiyi həcmdən az investisiya qoyub və yatırılmış vəsaitlərdə qiymətlərlə bağlı suallar var, yəni investisiya obyektinin dəyərilə həqiqi rəqəm arasında fərq var.
