Azərbaycan və Türkiyə hökumətləri qısa müddət ərzində NMR-in borclarının qaytarılması probleminin həlli ilə bağlı razılığa gəlmək niyyətindədir. Türkiyənin dövlət naziri Mehmet Aydının Trend ə verdiyi məlumata görə, söhbət müddətlərin dəqiqləşdirilməsi və Türkiyəyə olan borcların qaytarılması yollarından gedir.
Ötən həftə borclarla bağlı məsələnin Azərbaycan-Türkiyə hökumətlərarası komissiyasının əsas müzakirə mövzusu olmasına baxmayaraq qərar qəbul olunmayıb. "Bizim borclardan xəbərimiz var və buna görə də borcun məbləğinin dəqiqləşdirilməsinə ehtiyac yox idi. Əsas borcun hansı müddət ərzində qaytarılmasıdır. Müvafiq təşkilatlar ödəmə mexanizmlərinin müəyyən edilməsi istiqamətində iş aparacaq", - deyə dövlət naziri qeyd edib. Baş nazirin müavini Abid Şərifov da əmindir ki, qısa müddət ərzində razılıq əldə olunacaq. Türkiyə tərəfi isə artıq öz təkliflərini verib.
NMR Türkiyənin Eksimbankına $20 mln borcludur və bu məbləğ kredit vəsati ilə taxılın alınması nəticəsində əmələ gəlib.
Türkiyə tərəfi AR-in Eksimbanka olan digər borcu kimi bu borcu da restrukturlaşdırmağa hazırdır. Buna görə də borcun qaytarılması şərtlərinin müzakirəsini təklif edir.
NMR-ə verilən elektrik enerjisinə görə Azərbaycanın Türkiyəyə $141,87 mln borcu var. Hər ay NMR-ə saatda 35-40 kV elektrik enerjisi verilir.
