Koreyanın Woori Bank-nın Gürcüstan sərhədinə qədər olan avtomobil magistralının bir hissəsinin maliyyələşdirilməsi layihəsində iştirakını müzakirə etmək üçün gələn həftə bankın missiyasının Bakıya səfəri gözlənilir. Nazirlikdən Trend ə verilən məlumata əsasən, 88,8 km-lik Yevlax-Gəncə yolunun banka verilməsi haqqında qərar artıq qəbul olunub.
Bu yolun dörd zolaqlı edilməsi üçün bank $120 mln. vəsait ayırmağı təklif edir. Bu vəsaitə avtomobil yolunun texniki-iqtisadi əsaslandırılmasının hazırlanması xərcləri də daxildir.
Koreya bankından başqa, BNP Paribas, DB, Slovakiyə İxrac Bankı da bu layihədə iştirak etmək istəyini bildirib. Hökumət artıq BNP Paribas-a da maliyyələşdirmə üçün mandat verib. Bank ilkin olaraq $120 mln. kredit təklif edib, indi isə $200 mln-dan çox yatırmaq niyyətini ifadə edib. Hacıqabul-Yevlax yolunun maliyyələşdirilməsi üzrə təklif də dəyişib. Hacıqabulda tikinti işləri getdiyi üçün BNP Paribas Gürcüstan sərhədindən başlanan hissəni maliyyələşdirmək istəyir.
Hökumət Hacıqabul-Gürcüstan sərhədinə qədər olan sahənin genişləndirməsi işlərinin nə vaxt başa çatacağını dəqiqləşdirməyib, Bakı-Gürcüstan sərhədinə qədər olan hissədə aparılan bərpa işləri isə 2008-ci ilə qəbər qurtaracaq.