Azərbaycan Milli Bankı avqustun sonuna qədər "Mikromaliyyə təşkilatları haqqında" qanun layihəsi üzrə işçi qrupunun rəylərini gözləyir. Bu barədə Trend ə bankın baş direktoru Rüfət Aslanlı bildirib.
Yeni qanun layihəsinin hazırlanması üzrə işçi qrupuna Mikromaliyyə İnstitutları Assosiasiyası, bir neçə iri qeyri-bank kredit təşkilatı, İqtisadi İnkişaf Nazirliyi, AMB, Ədliyyə Nazirliyinin nümayəndələri daxildir.
"Biz beynəlxalq təcrübəni öyrənmişik. Dünyada mikromaliyyələşdirmə üzrə vahid düstur yoxdur. 2001-ci ildə donorlar tərəfindən qəbul olunmuş və hazırda bazarda işləyən xüsusi tövsiyələr var. Praktikada isə bu prinsiplərə əsaslanan ölkələr də getdikcə bundan uzaqlaşır" - deyə R.Aslanlı vurğulayıb. O əlavə edib ki, həyat özü düzəlişlər edir. Bu prinsiplər çox da səmərəli deyil, çünki bazar özü qaydaları diktə edir.
Bununla əlaqədar işçi qrupu həm bazar oyunçularını və xidmət istehlakçılarını, həm də dövləti qane edən qanun layihəsini hazırlamağı qərarlaşdırıb. "Biz layihənin əsas parametrlərilə bağlı tam razılığa gəlmişik və yalnız bundan sonra işçi qrupu qanun layihəsini hazırlayıb və 10 gün əvvəl bu layihə işçi qrupunun üzvlərinə göndərilib" - deyə baş direktor bildirib.
R.Aslanlının fikrincə, onlardan əsas və fundamental təkliflər gözlənilmir, çünki qanun layihəsinin yundamental tərəfi tam razılaşdırılıb. Qanun layihəsində minimal nizamnamə kapitalının həcmi, müəyyən risklər və idarəetmə sisteminin müəyyənləşdirilməsi qeyd olunub. Nomativi müəyyənləşdirmək hüququ AMB-ya məxsusdur.
R.Aslanlı hesab edir ki, qeyri-bank kredit institutlarının xidmətlərindən ən çox yararlanan iqtisadi sektorların dəstəklənməsinə dair layihələr çoxdur. Bu institutlar da təkrarmaliyyələşdirmə mənbələrinə çevrilə bilər. "Bu institutlar səhm və ya digər qiymətli kağız buraxa və bununla da öz aktivlərini təkrar maliyyələşdirə bilər" - deyə o bildirib.
