2006-cı ilin sentyabr-oktyabr aylarında TRACECA nəqliyyat dəhlizi ilə təhlükəli yüklərin daşınması üzrə mütəxəssislərin hazırlanması çərçivəsində seminar keçiriləcək. Bu barədə Trend ə təşkilatın Azərbaycandan olan milli katibi Akif Mustafayev məlumat verib. Avropa Komissiyasının bu layihənin icrası üzrə keçirdiyi tenderin qalibi NEA (Niderland) və HPTE (Almaniya) şirkətlər alyansıdır.
Noyabrda nəqliyyat dəhlizinin iştirakçı ölkə ekspeditorları və operatorlarının hazırlanması layihəsi çərçivəsində treninqlərin keçirilməsi planlaşdırılır. Bu layihə tenderin qalibi olmuş Niderlandın NEA şirkəti tərəfindən gerçəkləşdiriləcək. Hər iki görüşün İstanbulda keçiriləcəyi gözlənilir.
Dəniz daşımaları üzrə idarə işçilərinin hazırlanması layihəsini Britaniyanın "Knayt Smart" şirkəti həyata keçirəcək.
Dəniz idarələri əməkdaşlarının hazırlanması layihəsində nəqliyyat dəhlizinin dənizə çıxışı olan 5 ölkəsi iştirak edəcək. Ekspeditorların hazırlanması layihəsi 10 ölkəni əhatə edəcək. Türkiyə, Bolqarıstan və Rumıniya bu istiqamətdə kifayət qədər inkişaf etmiş xidmətlərə malik olduğundan layihədə iştirak etməyəcək.