Azərbaycan nümayəndə heyəti işgüzar səfərlə İsveçə yola düşəcək. Nümayəndə heyətinin tərkibinə Dövlət Gömrük Komitəsi (DGK), Prezident Aparatı, Nazirlər Kabineti, Milli Məclis, Ədliyyə Nazirliyi, BMT-nin İnkişaf Proqramının (UNDP) nümayəndələri daxildir.
Səfər Azərbaycanda gömrük sisteminin təkmilləşdirilməsi layihəsi çərçivəsində sentyabrın 11-17-də baş tutacaq.
UNDP-nin Bakı nümayəndəliyindən Trend ə verilən məlumata görə, nümayəndə heyətinə DGK-nın sədr müavini Əsgər Abdullayev başçılıq edəcək. Bir həftə ərzində Azərbaycan təmsilçiləri İsveçin gömrük sistemi ilə tanış olacaq, bu ölkənin gömrük orqanlarının rəhbər şəxsləri ilə görüşlər keçirəcək.
Səfərdə əsas məqsəd İsveçin gömrük məcəlləsi təcrübəsinin öyrənilməsidir.
Avropa Komissiyasının maliyyələşdirdiyi və UNDP-nin gerçəkləşdirdiyi illik layihə 2006-cı ilin yanvarından başlayıb. Dəyəri 900 min avro olan layihənin məqsədi gömrük sahəsində qanunvericilik bazasının təkmilləşdirilməsində, onun dünya standartlarına, xüsusilə Avropa İttifaqının gömrük kodeksinə uyğunlaşdırılmasında, gömrük komitəsinin informasiya texnologiyalarının inkişaf strategiyasının təkmilləşdirilməsi və həyata keçirilməsində DGK-ya yardım etməkdir.