"İxracat alyanslarının yaradılması" mövzusunda dəyirmi masa noyabrın 9-da keçiriləcək. Azərbaycan İxracat və İnvestisiyaların Təşviqi Fondundan (AZPROMO) Trend ə verilən xəbərə görə, tədbir İqtisadi İnkişaf Nazirliyinin dəstəyi, TACİS layihəsi çərçivəsində AZPROMO-nun dəstəyi ilə təşkil olunub. Müzakirələrdə AZPROMO-nun Qəyyumlar Şurasına daxil olan sahibkarların, Avropa və yerli ekspertlərin iştirakı gözlənilir.
Dəyirmi masa arxasında "İxracat alyansları bizə nə verir", "Azərbaycan ixracatçıları alyanslarda birləşməyə hazırdırlarmı", "Yerli ixracatçılar üçün alyansların hansı növləri məqbuldur", "Alyanslar dövlət tərəfindən dəstəklənirmi" və s. mövzulara baxılacaq. Müzakirələrin yekununda ixracın dəstəklənməsi üzrə AZPROMO-nun fəaliyyəti üçün tövsiyyələr hazırlanacaq.
AZPROMO-nun dəstəyi ilə TACİS layihəsi çərçivəsində oktyabr ayında "Azərbaycanın investisiya qanunvericiliyi" və "Xarici investisiya axını üçün sənaye zonalarının yaradılması" mövzusunda iki dəyirmi masa keçirilib. 1 mln. avro həcmində büdcə layihəsinin reallaşdırılması 2006-cı ilin sonunadək başa çatmaqdadır.
