Bu il Agrolizing ASC-nin xətti ilə Azərbaycan üçün 29 min ton gübrə alınıb. Bu barədə Trend ə dövlət strukturunun rəhbəri Tariyel Rəsulov məlumat verib. Onun sözlərinə görə, bunun 16 min tonu artıq ölkəyə gətirilib. Pestisid və azotlu gübrələrin yerdə qalan hissəsi isə ilin sonunadək çatdırılacaq.
"Biz artıq 16,8 min ton gübrə vermişik və bu proses müntəzəm olaraq həyata keçirilir" - deyə T.Rəsulov qeyd edib.
Ötən il alınmış pestisid və azotlu gübrələrə gəlincə, müəssisə rəhbəri vurğulayıb ki, bu rəqəm 21 min ton təşkil edib. Bunun 4080 tonu azotlu gübrələrin payına düşüb.
Agrolizing ASC 23 oktyabr 2004-cü ildə Azərbaycan prezidenti İlham Əliyevin sərəncamı ilə yaradılıb. Müəssisənin fəaliyyəti ölkədə aqrar sahənin yaxşılaşmasına və yerli torpaq sahiblərinə lizinqlə müxtəlif kənd təsərrüfatı texnikası verməklə, sahibkarlığın dəstəklənməsinə yönəldilib. Hazırda ASC-nin ölkə bölgələrində 50-dən çox aqrotexniki servis filialları fəaliyyət göstərir.
