Azərbaycan İqtisadi İnkişaf Nazirliyi "Neft-qaz sahəsində ixrac fəaliyyəti haqqında" qanun layihəsinin hazırlığını başa çatdırıb. Bu barədə Trend ə iqtisadi inkişaf naziri Heydər Babayev məlumat verib.
"Qanun bütün strukturlarda ekspertizadan keçib və təklif və tövsiyyələri nəzərə almaqla tamamlanıb. Biz qanun layihəsini Prezident aparatı və Milli məclisə təqdim etmək üçün Nazirlər Kabinetinin qərarını gözləyirik. Bu sahədə güzəştlər Nazirlər Kabinetinin sərəncamına əsasən təqdim olunduğundan, onları qanun şəklində rəsmiləşdirmək daha düzgün olardı", - deyə nazir qeyd edib.
Öz mal, xidmət və işlərini ixrac edən şirkətlər üçün bir güzəşt nəzərdə tutulacaq və söhbət onları ƏDV ödənişindən azad etməkdən gedir. H.Babayev bu güzəştlərin kifayət etdiyini hesab edir.
Layihənin işlənib hazırlanmasında başlıca məqsəd Azərbaycanda qeydiyyatdan keçmiş, əməliyyatları ölkədən kənarda həyata keçirən xarici şirkətlər üçün vergi yükünün azaldılmasıdır. Onların arasında Technip, Total, Bos Shelf və Mersk şirkətləri var. Bu şirkətlər ölkədən kənarda həyata keçirilən regional layihələrdə iştirak etmək üçün hökümətə vergi güzəştlərinin təqdim olunması ilə bağlı təkliflər irəli sürüb.
Azərbaycandakı layihələr üzrə fəaliyyətin başa çatması ilə bağlı onlar Qazaxıstandan sifariş qəbul edirlər. Azərbaycanda əməliyyatları həyata keçirməyə davam edərək, şirkətlər Azərbaycanın həm gömrük, həm də vergi qanunvericiliyinə riayət etməlidirlər. Onlar artıq əməliyyatları həyata keçirirlər, qanun layihəsi təsdiq olunanadək isə onların vergi qoyması Nazirlər Kabinetinin bu yaxınlarda qəbul etdiyi sərəncama əsasən tənzimlənir. Həmin sərəncamda həmçinin ixrac məqsədilə həyata keçirilən mal və xidmətlərin ƏDV-dən azad olunması nəzərdə tutulub.
