Rusiya tərəfi Rusiya, Azərbaycan və İran arasında Şimal-Cənub marşrutu üzrə dəmir yolunun açılış layihəsinin dəyərinin ekspertizasını keçirir. Bu işlər tamamlandıqdan sonra layihənin reallaşdırılması davam edəcək. Trend xəbər verir ki, bu barədə Azərbaycanın nəqliyyat nazirinin birinci müavini Musa Pənahov məlumat verib.
Rusiya tərəfinin fikrincə, bu layihənin İran ərazisində reallaşdırılması (uzunluğu təxminən 300 km olan dəmir yol xəttinin tikintisi) çox yüksək qiymətləndirilib. Bu layihənin son qiyməti ekspertizadan sonra məlum olacaq.
Layihənin dəyəri böyük əhəmiyyətə malikdir. Azərbaycan, Rusiya və İran bu layihənin reallaşdırılması üçün kredit cəlb etmək niyyətində olan beynəlxalq konsorsium yaradıblar. Kredit daşınma tarifinə görə qaytarılacaq. Ona görə də layihənin dəyəri onun maliyyə balansı üçün mühümdür.
"Şimal-Cənub" nəqliyyat dəhlizi layihəsi Rusiya, Azərbaycan və İrandan keçməklə, Avropadan Hindistana və Cənub-Şərqi Asiya ölkələrinə vahid dəmir yolu nəqliyyatının yaradılmasını nəzərdə tutur. Layihənin reallaşdırılmasına 400 mln. ABŞ dollarından artıq məbləğ tələb olunur, həm də işlərin çox hissəsi Azərbaycanla sərhəddə qədər dəmir yolu nəqliyyatı olmayan İranda görüləcək. 20 mln. ABŞ dolları məbləğində müəyyən işlərin Azərbaycanda görülməsi nəzərdə tutulub.
Azərbaycanın nəqliyyat ekspertlərinin qeyd etdiyi kimi, Azərbaycan bu layihəni reallaşdırmaq üçün tələsməməlidir. Respublikanın ərazisində görülməsi nəzərdə tutulan işlərin həcmi çox da böyük deyil. Astara stansiyasına qədər təxminən 7,5 km yol çəkmək, təkər cütlərinin dəyişidirilmə sistemləri olan stansiya, sərhəd və gömrük infrastrukturunu inşa etmək lazımdır. Həmçinin sərhəd dəmir yolu körpüsü tikmək lazımdır. Lakin bu layihənin reallaşdırılması İranla paritet əsasda həyata keçiriləcək.
