Azərbaycan Milli Bankının (AMB) ekonometrik modelinə əsasən 2006-cı ilin yanvar-oktyabr ayları ərzində inflyasiyanın 7,6%-nin formalaşmasında 45,1% monetar amillərin payına düşüb.
Azərbaycan Milli Bankından Trend ə verilən məlumata görə, monetar amillər arasında başlıca təsir pul kütləsinədir. Bu sahədə artım 92,6% təşkil edib. Həm də Bu artım 2006-cı ilin yanvar ayından avqusta qədər dövrə düşür. Ötən ilin dekabr ayından 2006-cı ilin iyul ayına qədər qeyri-neft sektoru üzrə nominal səmərəli məzənnə artımı 0,2% təşkil edib.
İnflyasiyaya qeyri-monetar amillər xeyli təsir göstərib (54,9%). İnzibati cəhətdən nizamlanan qiymətlərin payı hesabat dövründə 20,3% təşkil edib, bu isə yanvar ayında dizel yanacağının qiymətinin 2, kerosinin - 1,3 dəfə, qəndin - 34,6% artması ilə əlaqədardır. Mövsüm amillərinin təsiri (-16,8%) səviyyəsində olub, bu sahədə may-avqust aylarında qiymətlər yay mövsümünün təsiri altında 3,6% ucuzlaşıb. Qış mövsümünün təsiri altında isə yanvar-aprel və sentyabr-oktyabr aylarında qiymətlər 3,8% bahalaşıb, bu isə öz növbəsində inflyasiyanın 15,9% artmasına səbəb olub.
İlin əvvəlinə nisbətən oktyabr ayında qida məhsullarının inflyasiyanın formalaşmasında iştirakı 76,2%, o cümlədən çörək və çörək məhsullarının payı - 3,5%, ət və ət məhsullarının payı-21,8%, meyvə-tərəvəz məhsullarının payı- 27,5%, yağ və piyin - 1,2%, süd və yumurtanın, - 11,8%, qənd və çayın - 10,1%, içki və tütünün payı - 0,3% təşkil edib. Bu dövr ərzində qeyri-ərzaq mallarının payı - 18,5%, xidmətlərin payı - 5,4% təşkil edib.
