Dünya bankı Azərbaycanın kiçik şəhərlərində su təchizatının və kanalizasiya sisteminin yaxşılaşdırılması üçün ilkin mərhələdə 129 mln. ABŞ dolları verməyə hazır olduğunu bildirib. Azərbaycanın Maliyyə Nazirliyindən Trend ə verilən xəbərə görə, bu vəsaitlər 9 şəhərin su təchizatı üçün nəzərdə tutulub.
Paralel olaraq DB su təchizatı və kanalizasiya sistemi, təmizləyici qurğuların və bu sahədə digər tədbirlərin maliyyələşdirilməsi üçün ümumi məbləği müəyyən etmək üçün ölkə üçün su infrastrukturunun yaxşılaşdırılması strategiyasını hazırlayır. Ümumilikdə DB-nin layihəsi 20 şəhəri əhatə edəcək.
Bank bu sektora təxminən 400-500 mln. ABŞ dolları ayırmağı planlaşdırır. Layihənin ilkin qiymətləndirilməsi layihə qruplarının rəhbəri Andreas Rodenin başçılıq etdiyi Dünya bankı missiyasının noyabr səfəri zamanı həyata keçirilib.
Artıq seçilmiş 9 rayon üzrə texniki-iqtisadi əsaslandırma hazırlanır. Gələcəkdə daha 10 rayonun layihəyə qoşulması planlaşdırılır, lakin bu, mərhələlərlə baş verəcək və hazırlıq işləri artıq razılaşdırılmış rayonlarda fiziki işlər başa çatdıqca başlayacaq.
