Dekabrın 15-17-də Azərbaycanın nəqliyyat infrastrukturunun inkişafının müxtəlif istiqamətlərini müzakirə etmək üçün Cənubi Koreyanın Nəqliyyat Nazirliyinin müşavirinin başçılıq etdiyi Koreya nümayəndə heyətinin Bakıya səfəri planlaşdırılır. Bu barədə Trend ə nəqliyyat nazirinin müavini Musa Pənahov məlumat verib.
Müzakirə olunan məsələlər arasında o, şəhər nəqliyyatının yenidənqurulması, dispetçer mərkəzinin təşkili, avtobusların alınması, sürətli dəmir yolu nəqliyyatının yaradılması, avtomobil yollarının inşası, körpülərin layihələndirilməsi və tikintisi və s. qeyd edib.
Koreya tərəfi layihələrin hazırlığı və onların maliyyələşdirilməsi ilə yanaşı ölkəyə həm də mövcud layihələrdə iştirak etməyi təklif edir.
O cümlədən, Woori Bank Azərbaycan hökümətinə avtomobil yolunun Gürcüstanla sərhəddə qədər genişləndirilməsi layihəsinin maliyyələşdirilməsində iştiraka hazır olduğunu bildirib. Artıq Koreya bankının Yevlaxdan Gəncəyə qədər yolun 88,8 km hissəsinin maliyyələşdirilməsinə cəlb olunması haqqında razılıq əldə olunub.
Avtomobil yolunun bu hissəsinin iki zolaqdan dörd zolağa çatdırılması üçün Woori Bank 120 mln. ABŞ dolları ayırmağı təklif edir. Bu vəsaitlərə həmçinin avtomobil yolunun genişləndirilməsinin texniki-iqtisadi əsaslandırılması üzrə xərclər də daxil edilib.
