Dünya Bankı mühasibat uçotu və audit sahəsində norma və standartlara əməl olunması barədə hesabat hazırlığını başa çatdırıb. DB-nin Bakı nümayəndəliyinin Trend ə verdiyi xəbərə görə, hesabatın təqdimetmə mərasimi dekabrın 6-da Bakıda keçiriləcək. Bununla əlaqədar olaraq Mərkəzi Asiya və Avropanın maliyyə menecmenti şöbəsinin rəhbəri Con Xeqarti respublikaya gəlib. Amma təqdimetmə mərasimini o yox, bu şöbənin əməkdaşları Conatan Xuper və Rancan Qanquli keçirəcək.
Hesabatda DB-nin mütəxəssisləri beynəlxalq təcrübə ilə mühasibat uçotu və audit yaranmasını analiz edib.
Tədbirdə Prezident Aparatının, Nazirlər Kabinetinin, Milli Məclisin, Maliyyə Nazirliyinin, İqtisadi İnkişaf Nazirliyinin, Milli Bankın, Audit palatasının və beynəlxalq təşkilatların nümayəndələrinin iştirakı planlaşdırılır. Hazırda DB Azərbaycanda Mühasibat uçotu sistemində islahatlar lahiyəsi hazırlayır.
Dövlət və Korporasiya sektorunda milli standartlar əsasında kredit bankının təsdiqi bankın 2007-ci maliyyə ilində gözlənilir. Kredit vəsaitlərinin maliyyə hesabatlarında beynəlxalq standartların tətbiqi, treninqlərin keçirilməsi, kadr hazırlığı üçün xərclənməsi nəzərdə tutulub. Lahiyənin hazırlanması üçün Beynəlxalq İnkişaf və Yenidənqurma Bankı 340 min dollar ayırıb.
DB-nin ayıracağı kreditin nəzərdə tutulmuş həcmi 10-15 mln. dollardır ki, bu, bankın Azərbaycanla yeni tərəfdaşlıq strategiyasına daxildir. Kreditin sonuncu məbləği hələ müzakirə olunacaq.
"Mühasibat uçotu barədə" yeni qanuna müvafiq olaraq 2007-ci ilin sonunadək ticarət təşkilatlarında mühasibat uçotunun milli standartlarla tətbiqi başa çatacaq. Büdcə və qeyri-hökumət təşkilatları bu prosesi 2008-ci ilin sonunadək başa çatdırmalıdır.