Azərbaycan Dövlət Dəmir Yolunun (ADDY) mütəxəssisləri respublikanın daxili bazarında enerji daşıyıcılarının qiymətinin yüksəldilməsi ilə əlaqədar tariflərin artırılması üzrə təkliflər hazırlayır. Bu barədə Trend ə çərşənbə axşamı dəmir yolu idarəsinin mətbuat xidmətindən məlumat verilib.
ADDY nümayəndəsinin sözlərinə görə, hazırda məsələ idarənin ekspertləri tərəfindən işlənir.
2006-cı ilin yanvar ayında dizel yanacağı və mazutun tarifləri yüksəldikdən sonra dəmir yolu artıq tariflərin artırılması haqqında təkliflə çıxış edib. Lakin Azərbaycanın Tarif (qiymət) Şurası bu məsələ ilə bağlı qərar çıxarmayıb.
"Bu yaxınlarda enerji daşıyıcılarının daxili qiymətlərinin təkrar qalxması ilə əlaqədar dəmir yolu bir daha tariflərin artırılması məsələsini qaldıra bilər", - deyə ADDY nümayəndəsi qeyd edib.
Ötən həftə Tarif şurasının qərarı ilə 2007-ci il yanvarın 8-dən Azərbaycanın daxili bazarında A-95 markalı avtomobil benzininin qiyməti 60 qəpik, A-92 və A-80 markalı benzinin qiyməti - 55 qəpik, dizel yanacağının qiyməti - 45 qəpiyə qədər artıb. 1 kVt/s elektrik enerjisinin dəyəri 6 qəpiyə qədər artıb.
