2007-ci ilin I rübündə iqtisadi əməkdaşlıq üzrə Azərbaycan-Latviya hökümətlərarası komissiyasının ilk iclasının keçirilməsi planlaşdırılır.
Cümə günü Azərbaycan İqtisadi İnkişaf Nazirliyindən Trend ə verilən xəbərə görə, görüşün Bakıda keçirilməsi nəzərdə tutulub və hazırda Latviya ilə əməkdaşlığın mümkün istiqamətləri ölkənin müvafiq nazirlik və idarələri ilə razılaşdırılır.
Azərbaycan tərəfdən həmsədr iqtisadi inkişaf naziri Heydər Babayev, Latviya tərəfdən isə həmsədr hələ rəsmi şəkildə təyin olunmayıb, çünki əvvəl bu vəzifəni iqtisadiyyat naziri Ayqar Ştokenberqs tuturdu, indi isə onun indiki iqtisadiyyat naziri Yuriys Strods əvəz etməlidir.
Görüş zamanı qarşılıqlı ticarətin inkişafının, bir sıra digər iqtisadi məsələlərin, eləcə də təhsil və turizm sahəsində əməkdaşlığın inkişafının müzakirə edilməsi planlaşdırılır, lakin iqtisadi məsələlər prioritet olacaq.
İki ölkə arasında əmtəə dövriyyəsi çox aşağıdır və investisiyalar demək olar ki, yoxdur. 2006-cı ildə 10 ay ərzində Azərbaycan və Latviya arasında əmtəə dövriyyəsinin həcmi 8474,2 min ABŞ dolları təşkil edib, bütün 2005-ci il ərzində isə 2004-cü illə müqayisədə 52% azalaraq, bu göstərici 7 mln. ABŞ dolları səviyyəsində olub.
Ötən il ölkələr arasında ixrac 6830,1 min ABŞ dolları, idxal isə - 1644,1 min ABŞ dolları təşkil edib.
İxracın əmtəə nomenklaturasında dizel yanacağı, neft-kimya məhsulları qeyd olunub, Latviyadan AR-ə isə əsasən süd məhsulları, dərman preparatları idxal olunur.
