Azərbaycan,Bakı/müxbir Trend İ.Xəlilova/Avropa Yenidənqurma və İnkişaf Bankı (AYİB) və Azərbaycanın Nəqliyyat Nazirliyi dəmir yol infrastrkturunun təkmilləşdirilməsi sahəsində əməkdaşlığın genişləndirilməsi imkanlarını nəzərdən keçirir. Bu barədə AYİB-in Bakı nümayəndəliyinin rəhbəri Aygen Yaikoğlu məlumat verib.
Onun sözlərinə görə, birinci mərhələdə Biləcəri və Böyük-Şor depolarında lokomotivlərə xidmət göstərildiyi bazaların yaradılması üçün 30 mln. dolların ayrılması, həmçinin Azərbaycan Dövlət Dəmir Yolu (ADDY) üçün ehtiyat hissələrinin alınması planlaşdırılır.
"Hazırda Nəqliyyat Nazirliyi tərəfindən dəmir yolunun inkişafı proqramı hazırlanır və onun başa çatdırılmasından sonra AYİB-in vəsaitlərinin cəlb oluna biləcəyi istiqamətlər nəzərdən keçiriləcək", - deyə nümayəndəlik rəhbəri bildirib.
Ölkə hökuməti Azərbaycan dəmir yolunun sürətini inkişaf etdirməyi nəzərdə tutur. Bunun üçün 600 mln. dollardan 760 mln. dollaradək investisiya tələb olunur. Lokomotivlərin əldə olunması ilə yanaşı, dəmir yolu və yenidən formalaşdırılmış strukturların yenidən qurulması nəzərdə tutulur.
Nəqliyyat Nazirliyinin nümayəndələrinin fikrincə, layihənin maliyyələşdirilməsi beynəlxalq maliyyə institutlarının kreditlərilə yanaşı, dövlət büdcəsinin vəsaitləri və ADDY-ın öz vəsaitlərini cəlb etməklə kombinə oluna bilər. DB ilə Azərbaycan hökuməti arasında əməkdaşlığın strategiyasına (2007-10-cu illər) dəmir yolu vasitəsilə nəqletmə və ticarətə dəstək layihəsinə əsasən, 80 mln. dolların ayrılması nəzərdə tutulub, lakin bank kredit məbləğinin artılırmasını istisna etmir, belə ki, AYİB-in vəsaitləri məhdud deyil.
