Azərbaycan,Bakı/müxbir Trend Ü.İsmayılova/ Azərbaycanda sığorta haqqında yeni qanunun qəbulu bu bazarın qərbin ümumi standartlarına uyğun inkişafına təkan verəcək. Bu barədə sığorta üzrə ekspert, Pasha Sigorta şirkətinin baş direktorunun müavini Nofəl Rzayev bildirib.
Onun sözlərinə görə, yeni qanunun qəbulundan sonra bazarda tab gətirmək üçün sərt şərtlər olacaq. "Qanunun müddəalarına uyğun olmayan şirkətlər bazardan sıxışdırılacaq. Nəticədə bazarda yalnız peşəkar biznes aparmağı bacaran, peşəkar korporativ menecmentə malik olan şirkətlər qalacaq", - deyə o bildirib.
Sığorta bazarının inkişafı templərinə toxunan ekspert qeyd edib ki, bu gün Azərbaycanda sığorta 90-cı illərin modelini xatırladır. Həmin vaxt əhali banklara inam bəsləmirdi. "Fikirləşirəm ki, dünya standartlarının tətbiqindən sonra sığorta inkişaf templərində bankları geridə qoyacaq", - deyə o bildirib.
Bazarın çatışmazlıqlarını qeyd edən Rzayev cəlbedici məhsulların olmamasını vurğulayıb.