Azərbaycan, Bakı /müx. / Trend İ.Xəlilova / Azersun Holding yaxın perspektivdə Rusiyada öz fəaliyyətini genişləndirməyi planlaşdırır. Rusiyanın Azərbaycandakı ticarət nümayəndəliyinin rəhbəri Yuri Şedrin çərşənbə günü bildirib ki, Azersun Holding artıq öz törəmə şirkətlərinin Moskva vilayətində açılması istiqamətində fəaliyyətə başlayıb.
İlkin olaraq burada çay fabrikinin, habelə meyvə-tərəvəz konserv müəssisəsinin tikintisi planlaşdırılır. "Azersun Holding-ə Moskva ətrafında müəssisələrin açılması ilə bağlı bir neçə variant təklif olundu. Lakin buradakı torpaq sahələrinin bahalığı ucbatından bu variantlardan imtina edildi. Hazırda Tula vilayəti və digər regionlar nəzərdən keçirilir. Biz Azərbaycan biznesinin Rusiya bazarına çıxması üçün hərtərəfli dəstək verməyə hazırıq" - deyən Şedrin bildirib ki, Krasnodar vilayətində də çayın yetişdirilməsi ilə bağlı plan mövcuddur.
Azersun Holding artıq Azərbaycanda, konkret olaraq Astara və Lənkəranda bu istiqamətdə fəaliyyət göstərir. Azərbaycan çayının Rusiyaya ixrac olunduğunu bildirən Şedrin qeyd edib ki, 2007-ci ilin yanvar-fevral aylarında Azərbaycanın ümumi ixracında Rusiyaya göndərilən çayın payı 3,1 faiz təşkil edib.