Azərbaycan, Bakı/ Trend müxbir İ.Xəlilova/ Azərbaycanın İqtisadi İnkişaf Nazirliyi yanında Antiinhisar Xidməti məşhur avtomobil markalı satış mərkəzlərinin monitorinqinə başlayıb. Araşdırmalar onların texniki xidmət mərkəzlərində də aparılır. Bu barədə cümə axşamı Dövlət Xidmətinin rəhbəri Samir Dadaşov bildirib.
"Söhbət bütün məntəqələrdən getmir və profilakalara aidiyyəti yoxdur, yalnız məşhur avtomobil şirkətlərinin distribüter məntəqələrinə aiddir",-deyə Dadaşov bildirib.
Monitorinqlərin aparılmasına ehtiyac istehlakçıların hüquqlarının pozulmasından irəli gəlir. Texniki baxış mərkəzləri avtomobil satışı zamanı zəmanət verir. Gedilmiş məsafədən asılı olaraq zəmanət verilir ki burda da antiinhisar qanunvericiliyinin pozulması halları müşahidə olunub. Şirkət istehlakçının üzərlinə belə bir vəszifə qoyur ki, hər hansı bir ehtiyat hissəsi tələb olunduqda bunu distibrüter mərkəzindən almalıdır. Əks halda zəmanət ləğv oluna bilər. Burada isə qiymətlər digər satış mərkəzlərindən fərqli olaraq bahadır. Beləliklə, istehlakçıya seçim hüququ verilmir.
Xidmət rəhbərinin sözlərinə görə, bu cür məhdudiyyətlər bütün avtomobil şirkətləri tərəfindən qoyulur. Araşdırmaların mayın sonuna kimi başa çatdırılması planlaşdırılır. Qanun pozuntusu törədənlərə qarşı isə hələ ki, heç bir sanksiya tətbiq olunmayıb.
"Monitorinqin nəticələrinə əsasən qərar qəbul olunacaq. Əgər bütün pozuntular eyni xarakterli olarsa, onlar aradan qaldırılacaq, əgər fərqlənərsə, onda hər birinə ayrılıqda iş açılacaq",-deyə Dadaşov bildirib.
