Azərbaycan, Bakı / Trend / Bakıya ABŞ-Azərbaycan Ticarət Palatasının (U.S.-Azerbaijan Chamber of Commerce - USACC) ərzaq və kənd təsərrüfatı üzrə missiyasının gələcəyi gözlənilir.
Verilən xəbərə görə, missiyanın sayca ikinci illik səfəri mayın 21-26-na planlaşdırılır. Səfər zamanı missiya Azərbaycanın kənd təsərrüfatı infrastrukturuna baxış keçirəcək, Zaqatala və İmişliyə baş çəkəcək, habelə icra hakimiyyəti nümayəndələri, kənd təsərrüfatı və iqtisadi inkişaf nazirləri daxil olmaqla, rəsmi şəxslər və sənaye təmsilçiləri ilə görüşəcək.
Missiyanın məqsədi aqrar və ərzaq sferasında Azərbaycan və ABŞ sahibkarları arasında qarşılıqlı işguzar əlaqələr yaratmaqdır.
USACC həmçinin ABŞ-Azərbaycan aqrobiznes forumunun keçirilməsini maliyyələşdirir. Missiyanın səfəri həmçinin "InterFood Azerbaijan 2007" 13-cü beynəlxalq sərgi ilə üst-üstə düşəcək. Bu sərgi mayın 23-25-də Bakıda keçiriləcək.
Bütün nümayəndələr öz şirkətləri və məhsulları barədə məlumatı USACC-ın lövhəsində yerləşdirə bilərlər. Missiyanın səfəri ABŞ Dövlət Departamenti, bu ölkənin Kənd Təsərrüfatı Departamenti və Azərbaycanın Kənd Təsərrüfatı Nazirliyi tərəfindən dəstəklənir.
