Azərbaycan, Bakı/ Trend müxbir Ü.İsmayılova/ Sığorta şirkətlərinin kapitallaşmasının artması Azərbaycanın sığorta bazarının artımına xidmət edəcək. Bunu bazar ertəsi "Azergarant" sığorta şirkətinin İdarə Heyətinin sədr müavini Şükür Hüseynov bildirib.
Maliyyə Nazirliyinin Dövlət sığorta nəzarəti şöbəsinin rəhbəri Namiq Xəlilov nazirliyin kapitallaşma ilə bağlı problemləri olan şirkətlərlə iş apardığını və bu şirkətlərin nizamnamə kapitallarının artırılmasına nail olmaq üçün iş gördüyünü bildirib. "Yekun nəticədə isə əgər bu şirkətlər kapitallarını tələb olunan səviyyəyə çatdırmasalar, onların gələcəyi yoxdur" - deyə Xəlilov söyləyib.
2007-ci il yanvarın 1-nə sığorta şirkətlərinin nizamnamə kapitalı 700 min manat, 2008-ci ilin əvvəlinə isə 1 mln. manat olmalıdır. 2010-cu il yanvarın 1-nə isə bu rəqəm 3 mln. manat təşkil etməlidir.
Hüseynov qeyd edib ki, Maliyyə Nazirliyinin sığorta şirkətlərinin kapitallaşmasının artırılması barədə qərar qəbul etməsi təbiidir. "Nizamnamə kapitalının artırılması o demək deyil ki, şirkət mütləq bağlanmalıdır. Bu iki və yaxud bir neçə şirkətin mülkiyyət formasının QSC-dən ASC-yə dəyişməklə birləşməsi deməkdir ki, bu da əlavə kapital cəlb edəcək" - deyə o söyləyib.
1993-cü ildən fəaliyyət göstərən "Azergarant" 25 növ sığorta xidməti üçün lisenziyaya malikdir ki, bunların da 3-ü məcburi sığorta növləridir.
İlin əvvəlindən şirkət nizamnamə kapitalını 700 min manatdan 1 mln. manata qədər artırıb.
Azərbaycanda hazırda 29 sığorta şirkəti fəaliyyət göstərir. Onlardan yeddisinin nizamnamə kapitalı minimal olmaqla 700 min manat təşkil edir. Məhz bu şirkətlər xarici kapital da istisna olmamaqla əlavə kapitalın cəlb olunması, yaxud birləşdirilməsi hesabına nizamnamə kapitalının artırılmasını istəyir.
