Azərbaycanda xörək duzu istehsalı üzrə zavodun inşası ilə bağlı tarixlər açıqlanıb
Azərbaycan, Bakı /müx. Trend Ü.İsmayılova/ Masazır qəsəbəsində xörək duzu istehsalı üzrə yeni zavodun tikintisinə ilin sonunda başlanılacaq. Bu barədə Azərbaycan İnvestisiya Şirkətinin (AİŞ) icraçı direktorunun müavini Riad Qasımov məlumat verib.
Qasımov qeyd edib ki, Masazır gölü yaxınlığında yaşayan yerli əhali zavoddakı işlərə cəlb olunacaq.
Zavodun səhmlərinin bir hissəsi AİŞ-ə məxsus olacaq.
"UNICEF Masazır duzunun analizini keçirib və belə qərara gəlinib ki, həmin duz yüksək səviyyəli duzdur. Gələcəkdə bu duz ixrac ediləcək" - deyə Qasımov bildirib.
"Azərsun Holdinq" üçün zavodun tikintisi təxminən 6 milyon avroya başa gələcək. Yaxın zamanlarda gölün ərazisinin kanalizasiya sularından təmizlənməsinə başlanılacaq.
Güman olunur ki, zavodun inşası ilə Türkiyənin "İnova" şirkəti məşğul olacaq, avadanlıq və texnoloji xətt isə Almaniyadan gətiriləcək.
