Azərbaycan, Bakı /müx. Trend İ.Xəlilova/ Azərbaycan Milli Bankı ölkənin pul bazarının araşdırılmasının 2007-ci il iyulun 1-nə olan nəticələrini elan edib. Milli Bankdan verilən məlumata görə, manatın geniş pul kütləsi (M2) ilin əvvəli ilə müqayisədə 605,3 mln. manat artaraq (28,3%) 2743 mln. manat təşkil edib. Nəqd pul kütləsi may ayı ilə müqayisədə 9,6% artıb, 2006-cı ilin iyun ayı ilə müqayisədə artım 222,2%, 2007-ci ilin əvvəli ilə müqayisədə isə 23,6% təşkil edib.
2007-ci ilin iyun ayında mövsümi təmizlənmiş nəqd pul kütləsi (M0) ötən aya nəzərən 12.2%, ötən ilin iyun ayına nəzərən isə 2,4 dəfə artıb.
Bu dövrdə mövsümi təmizlənmiş manatla geniş pul kütləsi (M2) ötən aya nəzərən 8.7 %, ötən ilin iyun ayına nəzərən isə 2,4 dəfə artıb.
M2 pul aqreqatının strukturunda müəyyən keyfiyyət dəyişiklikləri baş verib və pul aqreqatlarında xeyli artım qeyri-nəqd dövriyyənin hesabına baş verib.
Ötən ilin müvafiq dövrünə nəzərən manatla müddətli əmanətlər və depozitlər 4.5 dəfə, o cümlədən manatla uzunmüddətli əmanətlər 2.8 dəfə artıb. Manatla nəqd pul kütləsi (M0) 2.4 dəfə artıb, nəticədə M0-ın pul kütləsindəki xüsusi çəkisi 62.8%-ə çatıb.
Azərbaycan Milli Bankı belə bir qərara gəlib ki, ölkədə maliyyə innovasiyalarının sürətli inkişafı, xüsusən də mütərəqqi ödəniş sistemlərinin tətbiqi nəticəsində bank sisteminin pul yaratmaq qabiliyyətini xarakterizə edən göstəricilər də yaxşılaşmaqdadır.
Belə ki, manatla pul multiplikatoru ötən ilin müvafiq dövrü ilə müqayisədə 14.4% artaraq 1.35-ə yüksəlib. Azərbaycan Milli Bankı iyun ayında monetizasiyanın əmsalını da dəstəkləyib. İyun ayının yekunu üzrə manatla geniş mənada pul kütləsinin qeyri-neft ÜDM-də xüsusi çəkisi
ötən ilin iyun ayına nəzərən 12.5% artaraq 26.2 %-ə yüksəlib.