Gürcüstan, Tiflis / Trend müxbir N.Kirtsxalia/ Sentyabrın 20-də Gürcüstanda Azərbaycan, Gürcüstan və Türkiyənin nəqliyyat sistemini birləşdirəcək "Bakı-Tiflis-Qars" dəmir yolunun tikintisinin başlanması mərasimi keçiriləcək. Bu barədə Gürcüstan iqtisadi inkişaf nazirinin birinci müavini David Natroşvili məlumat verib.
Mərasimdə Azərbaycan prezidenti İlham Əliyev, Gürcüstan prezidenti Mixail Saakaşvili iştirak edəcəklər. Türkiyəni bu tədbirdə çox güman ki, baş nazir Rəcəb Tayyip Ərdoğan təmsil edəcək.
Natroşvili qeyd edib ki, təqdimat mərasiminin ssenarisi hazırlanır və gələcək tədbirlərin detalları dəqiqləşdirilir.
Dəmir yolunun Gürcüstan hissəsinin tikintisi məqsədilə Azərbaycan Gürcüstanın "Mardaba-Karsaxi dəmir yolu" MMC şirkətinə 25 il müddətinə 1% illik faiz dərəcəsi ilə 200 mln. dollar məbləğində kredit ayırıb.
Azərbaycan Beynəlxalq Bankı bu yaxınlarda "Bakı-Tiflis-Qars" dəmir yolunun Gürcüstan hissəsinin tikintisi layihəsinin operatoru olan "Mardaba-Karsaxi dəmir yolu" MMC-yə kreditinin birinci tranşını ayırıb. Kreditin birinci tranşının ümumi həcmi 40 mln. dollar təşkil edir. Bu vəsaitlər hesabına Gürcüstan ərazisində 29 km uzunluğunda yeni yol çəkiləcək, Türkiyə ilə sərhəddə təkər cütlüklərinin dəyişdirilməsi məntəqəsi tikiləcək, həmçinin köhnə yol bərpa olunacaq.
Azərbaycan, Gürcüstan və Türkiyə fevral ayında BTQ dəmir yolunun tikintisi ilə bağlı yekun sənəd imzalayıblar. Layihənin ümumi dəyəri 425 mln. dollar təşkil edir. İlkin mərhələdə dəmir yolu ilə 5 mln. tona qədər yük daşınması planlaşdırılır.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
