Azərbaycan, Bakı, 11 yanvar / Trend / 2007-ci ildə "Azəri-Çıraq-Günəşli" dəniz yatağı blokununun mənimsənilməsi ilə məşğul olan Azərbaycan Beynəlxalq Əməliyyat Şirkəti (ABƏŞ) 2006-cı ilin 21 mln. tonuna nisbətdə 29,3 mln. ton Azeri Light növlü neft ixrac edib.
2007-ci ilin aprel ayından ABƏŞ Bakı - Novorossiysk boru kəməri və Gürcüstanın Qara dənizdəki Batumi limanı istiqamətində dəmir yolu üzrə neft ixracını dayandırıb (ABƏŞ iştirakçıları - "ExxonMobil" və "Devon Energy"dən savayı). Lakin sentyabrda Bakı-Tbilisi-Ceyhan (BTC) boru kəməri işinin dayandırılması səbəbindən dəmir yolu üzrə neft ixracı bərpa olunub.
Bakı-Novorossiysk boru kəməri üzrə 2007-ci ildə 856,3 min ton neft ixrac olunub. 2006-cı ildə isə bu göstərici 3,5 mln. ton təşkil edib.
2007-ci ildə Batumi limanına 2006-cı ilin 4,2 mln. tonuna nisbətdə 986 min ton neft göndərilib.
BTC boru kəməri üzrə 2007-ci ildə 27,5 mln. ton neft ixrac olunub ki, bu göstərici 2006-cı ildə 7,7 mln. ton təşkil edib. BTC üzrə dekabrda 2006-cı ilin analoji dövrünün 1,7 mln ton göstəricisinə nisbətdə 2,6 mln. ton neft ixrac olunub.
Ümumilikdə ötən il ərzində təmir işləri səbəbindən Bakı-Subsa boru kəməri vasitəsilə neft ixrac olunmayıb. 2006-cı ildə Bakı-Supsa üzrə 5,62 mln. tonn neft nəql olunub.
