Azərbaycan, Bakı, 13 fevral / Trend / Azərbaycanın Dövlət Neft Şirkətinin (ARDNŞ) istehsal etdiyi qaz bir neçə mərhələdə təmizlənmədən keçir: ARDNŞ-nin şəxsi qazının təxminən 88 faizinin hasil edildiyi "Günəşli" yatağından qazın bütün daşınma xətlərində təmizləmə qurğuları quraşdırılıb, - ARDNŞ-nin məlumatında deyilir.
Son vaxtlar Azərbaycanda dövlət strukturları və KİV tərəfindən qazın keyfiyyəti məsələsi qaldırılır. "Azəriqaz" Qapalı Səhmdar Cəmiyyətinin nümayəndələrinin sözlərinə görə, ARDNŞ-dən verilən qaz, bütün keyfiyyət standartlarına cavab vermir.
ARDNŞ-nin məlumatında qeyd edilən kimi, dəniz platformalarında hasil edilən qaz, mayedən ayrılandan sonra, platformalararası boru kəmərləri ilə "Günəşli-4" və "Günəşli-14" platformalarına çatdırılır. Burada xüsusi qurğularda təmizlənmədən keçirlər. Bundan sonra qaz iki yüksək təzyiqli qaz borusu ilə "Neft Daşları" yatağına nəql olunur. Bu yataqda qaz yenidən təmizlənilir və "Neft Daşları - Bahar" boru kəmərinə ötürülür. Bu boru kəmərinin axırında da təmizləmə qurğuları quraşdırılıb.
"Bahar" yatağında qaz yenidən mayedən ayrılır və iki istiqamətdə ("Bahar-Qaradağ" və "Bahar-Hövsan") sahilə nəql olunur. Birinci boru kəməri ilə gələn qaz, Qaradağ qaztəmizləyici sahəsində və Azərbaycan qaz emalı zavodunda təmizləmədən keçir, bundan sonra abunəçilərə paylaşdırmaq üçün "Azəriqaz" QSC-yə verilir. İkinci boru kəməri ilə nəql edilən qaz, Hövsan qaztəmizləyici sahəsində təmizlənir və "Azəriqaz"a verilir.
Hər həftə qazın vermə-alma nöqtəsində "Azəriqaz" və ARDNŞ-nin müxəsəssiləri verilən qazın laborator araşdırmasını keçirirlər. Qaz standartlara müvafiq olmadıqda, "Azəriqaz" onu qəbul etmir.
Digər dəniz yataqlarında hasil edilən qaz, "Azəriqaz" a verilməzdən qabaq da təmizləmədən keçir.
Hazırda ARDNŞ yataqlarında qazın gündəlik hasilatı 18 mln. kubmetr təşkil edir. Ötən il ARDNŞ 5,2 mlrd. kubmetr qaz verib, bu da 2006-cı ilə nisbətən 1,4 mlrd. çoxdur.
2007-ci ildə Azərbaycan, xarici şirkətlər tərəfindən işlədilən "Şahdəniz" qaz-kondensat yatağından 1,6 mlrd. kubmetr qaz alıb. Azərbaycanın Beynəlxalq Əməliyyat Şirkəti 2,3 mlrd. kubmetr səmt qazı verib. Ümumilikdə 2007-ci il ərzində Azərbaycan 9,1 mlrd. kubmetr qaz alıb.
2008-ci ildə ARDNŞ təxminən 7 mlrd. kubmetr qaz verəcək, ABƏŞ və "Şahdəniz" dən 4,3 mlrd. kubmetr qaz alınacağı güman edilir. "Şahdəniz" yatağında hasil edilən və ABƏŞ-in verdiyi qaz, "BP"nin Səngəçal neft terminalının qurğularında təmizləmə keçir.
