Azərbaycan, Bakı, 04 mart / Trend / Hazırda "Azəri-Çıraq-Günəşli" yatağında neft hasilatı sutkada 730 min barel təşkil edir,- bu barədə həmin yataqların işlənməsi layihəsi üzrə "BP Azerbaijan" şirkətindən çərşənbə axşamı verilən məlumatda deyilir.
Şirkət nümayəndələrinin bildirdiyinə görə, "Qərbi", "Şərqi" və "Mərkəzi Azəri" platformalarında hazırda qazma işləri aparılan quyular 2008-ci ildə istismara veriləndən sonra, neftin hasilatı artırılacaq.
"Azəri-Çıraq-Günəşli" layihəsi üzrə birgə iş aparılması və pay bölgüsünə dair müqavilə 1994-cü ilin sentyabrında imzalanıb. "Çıraq" yatağında hasilata 1997-ci ildə başlanılıb, "Mərkəzi Azəri"də 2005-ci ilin əvvəlində, "Qərbi Azəri"də 2006-cı ilin əvvəlində, "Şərqi Azəri"də 2006-cı ilin sonunda hasilata başlanılıb. "Günəşli" yatağının dərin su qatlarında hasilata isə, bu ilin ortalarında başlanılması nəzərdə tutulur.