Azərbaycan, Bakı, 26 may/ Trend / Azərbaycanın Dövlət Neft Şirkəti payızın ortalarına Bahar-Hövsan-Suraxanı qaz kəmərini istismara verməyi planlaşdırır. Bu barədə ARDNŞ-nin bazar ertəsi yayılan məlumatında deyilir. Qaz kəmərinin sutkalıq buraxma gücü 5 mln. kubmetr səviyyəsində planlaşdırılır.
Uzunluğu 49 km olan qaz kəməri iki hissədən ibarətdir. Onun Bahar dəniz yatağı və Hövsan qəsəbəsini birləşdirən 37 kilometrlik hissəsi Xəzər dənizinin dibi ilə, suyun 14-16 metrliyində keçəcək. Qalan 12 km boru kəməri isə, Hövsan və Suraxanı qəsəbələrini birləşdirəcək və qurudan keçəcək.
Dənizdə işlərə iyulda başlamaq planlaşdırılır. İşlər "Süleyman Vəzirov" borudüzən gəminin yardımı ilə həyata keçiriləcək. Qaz kəmərinin sualtı hissəsinin sifarişçisi "28 may" neft-qaz çıxarma idarəsidir.
İşlərin baş podratçısı "Neftqaztikinti" trestidir. İki ay əvvəl trest sahildə qazın qəbulu üçün qurğular, ayırma sistemləri, qaz kondensatı üçün çənlər, həmçinin nasos stansiyaları kimi obyektlərin tikintisinə başlayıb.
Bir müddət əvvəl ARDNŞ tərəfindən "Mannesmann" alman şirkətinin istehsalı olan və 40 vaqondan ibarət ilk yüksək keyfiyyətli boru partiyası alınıb. Boruların ümumi uzunluğu 7-8 kilometrdir.
Qaz kəmərinin tikintisi üzrə işləri oktyabr-noyabrda başa çatdırmaq planlaşdırılır. Paralel olaraq boru kəmərinin quru sahəsi üzrə tikinti işləri aparılacaq.
Bahar-Hövsan-Suraxanı qaz kəməri ARDNŞ-nin qaz proqramı çərçivəsində, 2008-ci ildə istismara verilmək üçün nəzərdə tutulan iri obyektlərdən biridir.
