Azərbaycan, Bakı, 18 avqust/ Trend , müxbir E.İsmayılov, S.İlhamqızı/Yaxın günlərdə bir müddət əvvəl Türkiyə hissəsində yanğının baş verdiyi Bakı - Tbilisi - Ceyhan (BTC) boru kəməri ilə Azərbaycan neftinin nəqli bərpa olunacaq. Bu barədə Botas International Limited şirkətinin KİV ilə iş üzrə şöbəsinin rəhbəri Hüseyn Sağır bazar ertəsi telefonla Trend -a məlumat verib.
"Dəqiq tarix hələ müəyyən edilməyib, lakin yaxın günlərdə Bakı - Tbilisi - Ceyhan boru kəmərinin Türkiyə hissəsində təmir işləri başa çatacaq və neftin nəqli bərpa olunacaq", - Sağır bildirib.
Onun sözlərinə görə, yaxın vaxtlarda Türkiyənin rəsmi təhlükəsizlik orqanları neft kəmərində yanğının başvermə səbəblərini açıqlayacaq.
BTC layihəsinin iştirakçısı olan Botas şirkəti şəxsi vəsaitləri hesabına boru kəmərinin Türkiyə hissəsinin təmirini həyata keçirir, lakin "zərurət yaranarsa, Azərbaycan və Gürcüstan da bizə yardım göstərəcəklər", - Sağır bildirib.
Avqustun 5 - də axşam saatlarında Bakı -Tbilisi - Ceyhan neft kəmərinin Türkiyənin Ərzincan vilayətindən keçən hissəsində partlayış baş verib və nəticədə, 30 saylı nasosda yanğın başlayıb. Yanğın avqustun 11- də söndürülüb.
Xəzərin Azərbaycan sektorunda "Azəri" - "Çıraq" - "Günəşli" yataqlarının tammiqyaslı işlənilməsini həyata keçirən Azərbaycan Beynəlxalq Əməliyyat Şirkəti (operator BP) bu boru kəmərində yanğınla əlaqədar hasilatı azaldıb. BP- də hasilatın nə qədər azaldığını bildirmirlər, lakin iyulun yekunları üzrə sutkada, orta hesabla, 870 min bareldən çox olub.
Hasilat Bakı-Tbilisi-Ceyhan boru kəməri ilə ixracın dayandırılması və BP şirkətininin Səngəçal neft terminalında çənlərin dolması ilə əlaqədar azaldılıb.
BTC neft kəmərinin ümumi uzunluğu 1768 kilometrdir. Bunun 443 km Azərabaycan, 249 - Gürcüstan, 1076 km - Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlayıb.
BTC-nin tikintisi $4 mlrd. başa gəlib. Bu tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği $2,6 mlrd. təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); TRAO (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Müəlliflə əlaqə saxlamaq üçün elektron ünvan: [email protected]
