Azərbaycan, Bakı, 15 sentyabr/ Trend / Azərbaycan Dövlət NEft Şirkətinin Caspian Pipe Coatings zavodu "Şimal" elektrik stansiyası və Bakı ətrafının qazla təchizi üçün nəzərdə tutulan Bahar-Hövsan -Suraxanı sualtı qaz kəmərinin tikintisi üçün 32 km borunun betonlaşdırılmasını başa çatdırıb,- ARDNŞ -nin bazar ertəsi yayılan məlumatında bildirilir.
Uzunluğu 600 metr olan və 56 borudan ibarət birinci partiya Xəzər Dəniz Donanmasının "Nerça" nəqliyyat-yedək gəmisi ilə zavoddan "Süleyman Vəzirov" borudüzən gəmiyə gətirilib. Borular ağırlaşdırılmaları və qaz kəmərinin təhlükəsizliyinin təmin edilməsi, onun 30-40 il ərzində dənizin dibində hərəkətsiz vəziyyətdə qalması üçün betonlaşdırılıb.
ABŞ, Almaniya və Hollandiya istehsalı olan müasir texnologiyaların istifadə edildiyi zavod 24 saat işləyir və 30 gün ərzində zavodda 32 km boru betonlaşdırılıb. Zavod boruların betonlaşdırılmasına avqustda başlayıb. Bir növbə ərzində (doqquz saat) zavodda 140 boru betonla örtülür. Betonla örtülmüş hər borunun çəkisi altı tondur. Dənizin dərin sahələri üçün beton örtüyün qalınlığı 90 mm, dayaz sulu yerlər üçün 65 mm - dir.
20 düymlük Bahar-Hövsan-Suraxanı boru kəmərinin ümumi uzunluğu 49 kilometrdir (sualtı hissəsi 37 km, yerüstü - 12 km). Boru kəmərinin sutkalıq ötürmə gücü 5 mln. kubmetr qaza bərabərdir. Boru kəmərinin çəkiləcəyi dərinlik 12-16 metr arasında dəyişir. Qaz kəmərinin sualtı hissəsinin sifarişçisi "28 may" Neft-Qaz Çıxarma İdarəsi, yerüstü hissənin sifarişçisi Qaz Əməliyyatları İdarəsidir.
Boru kəməri ilə "Günəşli" dəniz yatağından hasil edilən qaz nəql ediləcək. Boru kəmərinin layihəsi "Dənizneftqazlayihə" institutu tərəfindən hazırlanıb. Boru kəmərinin düzülməsi ilə "Süleyman Vəzirov" borudüzən gəmisi məşğul olacaq. Boru kəməri ARDNŞ Nin 2008 - ci il üçün qaz proqramı çərçivəsində istismara veriləcək ən iri obyektlərdən biridir.
Proqram ARDNŞ - nin şəxsi vəsaitləri hesabına işlədiyi yataqlardan hasilatı ildə 8 mlrd. kubmetrədək artırmasını nəzərdə tutur. Bu həcmin 7 mlrd. kubmetri dövlətə veriləcək. Azərbaycanın Dövlət Neft Şirkətinin rəsmi saytında bildirilir ki, Caspian Pipe Coatings zavodunda iştirakın yarısı ARDNŞ -yə, 45 faiz Azertrans şirkəti və 5 faiz Azinvest-ə məxsusdur.
