Azərbaycan, Bakı, 27 sentyabr / Trend , müxbir E.İsmayılov/ Şənbə günü ABŞ-ın Beynəlxalq İnkişaf Agentliyi (USAID), "Chevron Khazar Ltd" və "StatoilHydro" şirkətləri Azərbaycan paytaxtında qarşılıqlı anlaşma memorandumu imzalayıblar. Bu barədə USAID-in cümə günü yayılan məlumatında bildirilir.
Memorandumun imzalanması Azərbaycanın "Junior Achievement Azerbaijan" təşkilatına ölkənin 230 orta məktəbində "Məktəblərdə iqtisadiyyatın tədrisi" proqramını reallaşdırmaq imkanı verəcək. Proqram 2008-2010-cu illər ərzində reallaşdırılacaq. Proqramda ölkənin orta məktəblərinin 300 müəllimi və minlərlə şagirdi iştirak edəcək.
Qarşılıqlı anlaşma memorandumunda nəzərdə tutulan "Məktəblərdə iqtisadiyyatın tədrisi" proqramı yuxarı siniflər səviyyəsində iqştisadiyyat və biznes təhsilinin aparılmasını təmin edəcək.
Proqram çərçivəsində, maliyyə, iş təcrübəsi və sahibkarlıq üzrə treninqlər də keçiriləcək.
Memoranduma əsasən, bu proqramın inkişafı üçün USAID təxminən $73 min, StatoilHydro təxminən $87 min, Chevron Khazar Ltd. - $50 min ayırıb, - şənbə günü USAID-in Azərbaycan üzrə əlaqələndiricisi Skott Teylor deyib.