Azərbaycan, Bakı, 02 oktyabr/ Trend , müxbir E.İsmayılov/ SOCAR şirkətinin (Azərbaycanın Dövlət Neft Şirkəti) təsisçilərindən biri olduğu SOCAR Georgia şirkəti Tbilisidə yeni ofisinin tikintisinə başlayıb, - SOCAR Energy Georgia-nın rəhbəri Mahir Məmmədov cümə axşamı telefonla bildirib.
Tenderin yekunları üzrə yeni ofisin tikintisini Gürcüstan şirkəti aparır. Şirkətin adı açıqlanmır.
Məmmədovun əvvəllər bildirdiyinə görə, yeni ofisin tikintisini ilin sonuna başa çatdırmaq planlaşdırılır.
SOCAR Georgia 4 min kvadratmetrdən çox sahəsi olan torpaq sahəsində tikiləcək binada yerləşəcək. Şirkət bu torpaq sahəsi üçün təxminən $3 mln. ödəyib.
SOCAR Energy Georgia Gürcüstanın neft və neft məhsulları bazarında distribusiya və marketinqlə məşğuldur. O Gürcüstan bazarında neft məhsulları və qaz satır, yanacaqdoldurma məntəqələri şəbəkəsinə malikdir. SOCAR Georgia-nın həmtəsisçiləri aşağıdakılardır: ARDNŞ - 51 faiz, Petro-Trans FZCO - 32,7 faiz və İvan Çxartişvili - 16,3 faiz.