Azərbaycan, Bakı, 21 noyabr/ Trend , müxbirlər Ü.İsmayılova, E.İsmayılov/ "Mərkəzi Asiya Regional İqtisadi Əməkdaşlıq (CAREC) Proqramı çərçivəsində, Azərbaycanda Rusiya, Gürcüstan və İranla elektrik ötürücü xətlərin (EÖX) təkmilləşdirilməsinə, qaz nəqli sisteminin bərpası və qazın məşəl yandırılması həcmlərinin azaldılmasına bir milyard dollar ayrılacaq", - Asiya İnkişaf Bankının vitse-prezidenti Hyu Jao (Xiaoyu Zhao) cümə günü Bakıda bildirib.
Dəyəri 231,7 mln. dollar olan bu layihələr çərçivəsində, 550, 330, 220 və 110 kilovoltluq EÖX və yarımstansiyaların tikintisi nəzərdə tutulur ki, bu da ölkələr arasında enerji mübadiləsini artırmağa imkan verəcək.
Layihənin ümumi dəyərindən 70 mln. dollar Azərbaycan tərəfindən şəxsi maliyyələşdirmə, 81 mln. dollar beynəlxalq maliyyə institutlarından cəlb edilmiş vəsaitlər, 81 mln. dollar digər mənbələrin payına düşəcək.
Azərbaycanda qaz nəqli sisteminin bərpasına 669 mln dollar həcmində sərmayə yatırılacaq. Daha 60 mln dollar qazın məşəldə yandırılmasının azaldılması layihəsinə yatırılacaq. Bu layihələrə yatırılacaq vəsaitlərin ümumi həcmindən (729 mln. dollar) 219 mln. dollar Azərbaycanın şəxsi vəsaitləri, 225 mln. dollar beynəlxalq maliyyə institutlarından cəlb edilmiş vəsaitlər, 225 mln. dollar isə digər mənbələrin payına düşəcək.
Mərkəzi Asiya İqtisadi Əməkdaşlığı Proqramı AİB-in təşəbbüsü ilə 1998-ci ildə təsis edilib.CAREC - səkkiz iştirakçı dövlətin (Əfqanıstan, Azərbaycan, ÇXR, Qazaxıstan, Qırğızıstan, Monqolustan, Tacikistan və Özbəkistan) və altı beynəlxalq təşkilatın (AIB, AYİB, BVF, İİB, BMT İnkişaf Proqramı və Dünya Bankı) tərəfdaşlığıdır.
Proqram infrastruktur layihələrinin maliyyələşdirilməsi və nəqliyyat, ticarətə yardım, ticarət siyasəti və energetika kimi prioritet sahələrdə regional siyasətin təkmilləşdirilməsinə yönəlib.
Müəlliflə əlaqə saxlamaq üçün elektron ünvan: [email protected]
