Azərbaycan, Bakı, 13 yanvar/ Trend / SOCAR şirkətinin Xəzər Dəniz Neft Donanmasının "Zöhrab Vəliyev" mühəndis - geoloji gəmisi dərin platformaların quraşdırılması, boru kəmərlərinin çəkilməsi və digər iri dəniz obyektlərinin tikintisi üçün "Livanov bankası" (Türkmənistan) yatağında dəniz qruntunun tərkibi və dayanıqlılığının zondlaşdırılması və tədqiqini aparır, - SOCAR şirkətinin (Azərbaycanın Dövlət Neft Şirkəti) çərşənbə axşamı yayılan məlumatında deyilir.
Hazırda gəmi Xəzərin Türkmənistan sektorundadır. Bundan başqa, "Zöhrab Vəliyev" suyun 100 metr dərinliyində kern yığılmasını aparacaq.
"Livanov bankası" yatağı hələ 1972 - ci ildə azərbaycanlı neftçilər tərəfindən açılıb.
"Zöhrab Vəliyev" gəmisi 1985 - ci ildə istismara verilib. O, ağır hidrogeoloji şəraitdə 32 gün işləyə bilər. Hidrogeoloji işlərin aparılması üçün gəmidə suyun 150 metr dərinliyində qazma işlərini həyata keçirə bilən qazma qurğusu quraşdırılıb.
Bu il gəmi təmirdən keçib, gəmidə Amerika və Hollandiya istehsalı olan yeni geofiziki, geoloji və naviqasiya avadanlığı quraşdırılıb.
