Bakı.Trend:
İtaliyanın Auqusta limanında CIF bazasında Azərbaycanın Azeri Light markalı neftinin qiyməti əvvəlki göstərici ilə müqayisədə 3,38 ABŞ dolları və ya 4,3 faiz artaraq bir barel üçün 81,29 ABŞ dolları təşkil edib.
Bu barədə neft bazarının iştirakçılarının məlumatında bildirilir.
" Türkiyənin Ceyhan limanında FOB bazasında Azeri Light markalı Azərbaycan neftinin qiyməti 3,3 ABŞ dolları və ya 4,4 faiz artaraq bir barel üçün 78,36 ABŞ dollarına çatıb. URALS markalı xam neftin qiyməti əvvəlki göstərici ilə müqayisədə 2,78 ABŞ dolları və ya 6,3 faiz artaraq bir barel üçün 46,93 ABŞ dolları təşkil edib. Şimal dənizində hasil olunan Dated Brent markalı neftin qiyməti isə əvvəlki göstərici ilə müqayisədə 3,12 ABŞ dolları və ya 4,2 faiz artaraq bir barel üçün 77,32 ABŞ dollarına yüksəlib", – məlumatda deyilir.
Qeyd edək ki, Azərbaycanın 2026-cı il dövlət büdcəsində neftin bir barelinin orta qiyməti 65 ABŞ dolları səviyyəsində nəzərdə tutulub.
“Trading Economics”in son məlumatına görə, çərşənbə axşamı Brent markalı neftin qiyməti bir barel üçün 84 ABŞ dollarını ötüb. Həftənin əvvəlindən etibarən artım 10 faizi keçib. Buna səbəb ABŞ Prezidenti Donald Trampın Hörmüz boğazından keçən İran gəmilərinə qarşı blokadanı yenidən tətbiq etməsi və bu su yolu ilə daşınan digər bütün yüklərə xüsusi ödənişlərin tətbiq ediləcəyini elan etməsidir.
Qeyd olunur ki, blokadanın bu gün ABŞ-nin şərq sahili vaxtı ilə saat 16:00-da qüvvəyə minməsi nəzərdə tutulur.
“Tramp həmçinin daşınan yüklərə görə 20 faizlik kompensasiya
ödənilməsinə çağıraraq bildirib ki, Hörmüz boğazında gəmiçiliyin
təhlükəsizliyinin təmin edilməsi istiqamətində ABŞ-nin səylərindən
faydalanan ölkələr Vaşinqtona bunun əvəzini ödəməlidirlər. O, bu
ölkələr sırasında Səudiyyə Ərəbistanını, Birləşmiş Ərəb
Əmirliklərini, Qətəri, Bəhreyni və Küveyti göstərib.
Bu tədbirlər Vaşinqton və Tehran arasında gərginliyin yenidən
artması fonunda həyata keçirilib. ABŞ İranın dəniz daşımalarını
pozmaq imkanlarını məhdudlaşdırmağa çalışdığı halda, Tehran buna
cavab olaraq regiondakı ABŞ müttəfiqlərinə zərbələr
endirir”,-deyə“Trading Economics”in məlumatında deyilir.
Məlumatda vurğulanır ki, Tramp həmçinin mərhum senator Lindsi Qremin təşəbbüsü ilə hazırlanmış və Rusiyaya qarşı sanksiyaların sərtləşdirilməsini nəzərdə tutan qanun layihəsini dəstəkləyəcəyini bildirib. Sənəd Rusiya nefti və təbii qazını alan ölkələrə qarşı məhdudlaşdırıcı tədbirlərin yenidən tətbiqini nəzərdə tutur.
