Azərbaycan, Bakı, 19 mart / Trend , müxbirlər E.İsmayılov, А.Bədəlova /
"Bu gün Azərbaycanda internet-xidmətlərinin qiymətləri regional səviyyədən aşağıdır", - Azərbaycan rabitə və informasiya texnologiyalari naziri Əli Abbasov deyib.
"Artıq bu gün bizim böyük regionumuzda Azərbaycanda internet qiymətləri orta səviyyədən aşağıdır", - Abbasov bildirib.
Onun sözlərinə görə, internet qiymətləri sərbəst bazar qiymətləridir və dövlət tərəfindən idarə edilmir.
"Qiymətləri birbaşa, əmrlə azaltmaq mümkün deyil. Biz müəyyən tədbirləri həyata keçiririk, amma lazımi elastiklik dövrü var. Məsələn, dekabrda qiymətlərin azaldılması haqda qərar qəbul etmişik. Biz bunu yayda nəzərdən keçirəcəyik", - Abbasov bildirib.
Dekabrda Rabitə Nazirliyi özünün təqdim etdiyi internet kanalların qiymətlərinin azaldılması haqda qərar qəbul edib. Bu ilin yanvarından isə ölkədə internet qiymətləri provayderlər tərəfindən azaldılıb.
Bir müddət əvvəl nazirlikdə deyildiyi kimi, Rabitə Nazirliyinin (RN) internetin inkişafı üzrə koordinasiya şurası martın sonuna qədər ölkənin hazırkı internet-bazarının durumunu, o cümlədən ümumdünya şəbəkəsinə çıxışın qiymətlərinin azaldılmasını müzakirə edəcək. Ehtiyac olarsa, internet qiymətlərinin bundan sonra da azaldılması haqda tövsiyələr veriləcək.
RN-nin monitorinqinin nəticələrinə görə, internet-xidmətlərə, xüsusilə ADSL texnologiyalar vasitəsi ilə internetə qoşulmanın Azərbaycandakı orta qiyməti regiondakı orta qiymətlərə uyğun gəlir.
Azərbaycanda 1Mbit/s sürətli limitsiz aylıq paket 60-165 manat təşkil edir.
RN regionu nəzərə alaraq qeyd edir ki, Gürcüstanda eyni paket təxminən 140 manatdır.
Ukraynada bu rəqəm 30-130 manat arasında dəyişir.
Belarusda - 240-380 manat
Moldova - 10- 135 manat (üstəgəl 35 manat qoşulma xərci)
Rusiyada regionlardan asılı olaraq 12-135 manat.
Qazaxıstan - təxminən 120 manat
Ermənistanda 1024/128 kbit/s sürətli aylıq limitsiz paket 80 manatdır.
Qırğızıstanda 128/128 kbit/s sürətli aylıq limitsiz paket 60 manatdır.
Monitorinq Rabitə Nazirliyinin kollegiyasının nazirlik tərəfindən internet-xidmətlər sektorunun mütəmadi monitorinqi və bazarın bu seqmentinin durumunun ictimaiyyətə çatdırılması haqda qərarı əsasında keçirilib.
Məqalə müəllifi ilə əlaqə ünvanı: [email protected]
