Azərbaycan, Bakı, 14 may / Trend müxbir E.İsmayılov/
"Rusiya ərazisində planlaşdırılmış profilaktik işlər səbəbindən Azərbaycan neftinin Bakı-Novorossiysk boru kəməri ilə nəqlinə 72 saat ərzində fasilə verilib", - cümə axşamı işlərə yaxın mənbə bildirib.
"Bu istiqamətdə neft nəqli profilaktik işlər səbəbindən müvəqqəti olaraq dayandırılıb. Belə dayanmalar plan üzrə işlərin həyata keçirilməsi üçün mütəmadi şəkildə baş verir. Neft nəqli 72 saat ərzində bərpa ediləcək", - mənbə bildirib.
Mənbənin məlumatına görə, neftin nəqli Bakı vaxtı ilə saat 13:00-da dayandırılıb və mayın 16-da təxminən eyni vaxtda bərpa ediləcək.
Cari ilin yanvar-aprel ayları ərzində neft kəməri ilə 890 min neft nəql olunub. Ötən ilin analoji dövründə bu rəqəm təxminən 408 min ton olub. Mayda kəmərlə 225 min ton, iyunda 171 min ton, iyulda 248 min ton, avqustda 240 min ton, sentyabrda 140 min ton, oktyabrda 248 min ton, noyabrda 240 min ton, dekabrda isə 140 min ton neft nəqli proqnozlaşdırılır. Ümumilikdə, bu il Bakı-Novorossiysk kəməri ilə 2,55 milyon ton neft nəqli planlaşdırılır. Ötən il bu rəqəm 1,3 milyon ton olub.
Bu gün Bakı-Novorossiysk kəməri ilə neft nəqli zamanı Azərbaycan çıxışda (Novorossiysk limanında) Urals markalı neft əldə edir. Səbəb neftin başqa istehsalçıların nefti ilə qarışmasıdır.
2007-ci ilin sonuna qədər Bakı-Novorossiysk kəmərinin operatoru ABƏŞ idi. Hazırda bu funksiyanı SOCAR yerinə yetirir.
Məqalə müəllifi ilə əlaqə ünvanı: [email protected]
