Azərbaycan, Bakı, 27 iyul / Trend , müxbir E.İsmayılov /
Azərbaycanın Sənaye və Energetika Nazirliyi yanında Altenativ və bərpa olunan enerji mənbələri üzrə Dövlət Agentliyinin yaradılması ölkədə energetikanın bu perspektiv sahəsinin inkişafında müsbət nəticələr verəcək. Bu barədə bazar ertəsi Sənaye və Energetika Nazirliyi yanında Dövlət Qaz Nəzarət İdarəsinin başçısı Asif Zeynalov bildirib.
"Bu sahənin böyük perspektivləri var, xüsusilə də Azərbaycanda üzərində su elektrik stansiyalarının tikilmə şəraiti olan çaylar, külək və günəş var. Bu agentliyin yaradılması mühim addımdır", - deyə Zeynalov bildirib.
Zeynalovun fikrincə, alternativ enerji mənbələrinin inkişafı bir çox Avropa ölkələrindəki kimi elektrik stansiyalarında istehsal edilən enerjidən (qaz əvəzinə) geniş şəkildə istifadə etməyə imkan yaradacaq. Yaxın zamanlarda günəş batareyaları, külək və su enerjisi bütün sahələrdə geniş şəkildə istifadə olunacaq.
Agentliyin yaradılması bu sahəyə dövlət nəzarəti baxımından çox vacibdir.
Azərbaycan Prezidentinin 2009-cu ilin 16 iyul tarixindəki sərəncamı ilə Azərbaycanın Sənaye və Energetika Nazirliyi yanında Altenativ və bərpa olunan enerji mənbələri üzrə Dövlət Agentliyi təsis edilib.
Azərbaycan Prezidenti İlham Əliyevin əvvəlcədən Nazirlər Kabinetinin ilin birinci yarısında sosial-iqtisadi inkişafın yekunları üzrə iclasında bildirdiyi kimi, Azərbaycan mütləq alternativ enerji mənbələri üzərində işləməlidir, ilk növbədə ölkənin kiçik çaylarında kiçik su elektrik stansiyalarının inşası vacibdir.
Dövlət başçısının əvvəlcədən bildirdiyi kimi, külək enerjisi ilə yanaşı, günəş enerjisindən də səmərəli şəkildə istifadə olunmalıdır. "Bizim lazımi qədər "küləyimiz və günəşimiz" var. Bu kimi təbii imkanlardan biz səmərəli şəkildə istifadə etməliyik", - İlham Əliyev əlavə edib.
Bu sahəyə həm yerli, həm də xarici şirkətlər cəlb edilməlidir. İlham Əliyevin fikrincə, növbəti ildən dövlət büdcəsi hesabına Azərbaycan pilot layihələr qismində külək və günəşdən enerji istehsal etmək üçün praktik işlər həyata keçirməlidir.
İlham Əliyevin də qeyd etdiyi kimi, indiyə qədər alternativ enerji mənbələri məsələsi ilə ciddi məşğul olunmayıb, çünki prioritet məsələ. ölkənin enerji təhlükəsizliyinin təmin edilməsi məsələsi olub. Azərbaycanda son illərdə inşa edilən elektrik stansiyaları bu məsələni həll edib. Hazırda ölkə xaricdən elektrik enerjisinin idxalından asılı deyil, eyni zamanda elektrik enerjisini Rusiya, İran, Gürcüstan və Türkiyəyə ixrac edir.
Məqalə müəlllifi ilə əlaqə ünvanı: [email protected]