Qazaxıstan, Astana, 10 avqust / Trend , müxbir K.Konırova /
Qazaxıstan şirkətləri İraqın neft-qaz sektorunda keçirilən tenderlərdə fəal iştirak edə bilər, bu barədə Trend -ın müxbirinə İraqın Qazaxıstandakı işlər vəkili Haldun Əl-Cami bildirib.
"Mənim fikrimcə, bu kifayət qədər perspektivli istiqamətdir. Mən bu məsələni müzakirə etmək üçün Qazaxıstanın energetika və mineral resurslar naziri Sauat Mınbayev ilə görüşdüm", - deyə Əl-Cami bildirib.
Diplomat xatırladıb ki, İraq iqtisadiyyatının 95 faizi neft ixracı ilə bağlıdır. Ötən müharibə illəri ərzində ölkənin infrastrukturu, həmçinin neft sahəsi xeyli zərər çəkib.
"İraq xalqının rifahını bərpa etmək üçün biz neft sahəsi infrastrukturunu bərpa etməklə əvvəlki gücü geri qaytarmağa çalışırıq", - o qeyd edib.
Əl-Caminin verdiyi məlumata görə, hazırda İraq sutkada təxminən üç milyon barel neft ixrac edir, lakin bu göstəricini sutkada səkkiz milyon barelə kimi çatdırmağa çalışılır.
"Xatırlayıram, Sovet İttifaqı dövründə İraqa dəvət olunan Qazaxıstan mütəxəssisləri ölkəmizin bir çox mühüm layihələrində işləyirdilər. Bu təcrübəni yenidən dirçəltmək olar" - iraqlı diplomat qeyd edib.
Məqalə müəllifi ilə əlaqə ünvanı: [email protected]
